ფილანთროპმა ბილ გეიტსმა და Wellcome-ის ფონდის დირექტორმა, ჯერემი ფარარმა, საზოგადოებას მოუწოდეს სიფრთხილე გამოიჩინონ კორონავირუსის განვითარების პროგნოზირებაში.
„საუბარი პანდემიის დასასრულზე ან მოლოდინზე, რომ ერთ დღეს გაიღვიძებთ და ის დასრულებული იქნება, ნაადრევია. ჩვენ უნდა მოვემზადოთ განსხვავებული სცენარებისთვის, რომლებიც შესაძლოა არც ისე ვარდისფერი იყოს”,- თქვა ფარარმა.
მისივე თქმით, მიუხედავად იმისა, რომ ვაქცინების წყალობით, არაერთი ქვეყანა ახერხებს გაუმკლავდეს ომიკრონს, მსოფლიოს დიდი ნაწილი დაუცველი რჩება და ახალი ვარიანტები კვლავ საფრთხეს ქმნიან.
ბილ გეიტსი ვარაუდობს, რომ მოსახლეობაში იმუნიტეტის დონის მატებამ შეიძლება შეამციროს ომიკრონის და მომავალი ვარიანტებისგან მომავალი საფრთხე, მაგრამ პანდემიის კურსის პროგნოზირება სახიფათო რჩება.
„ჩვენ არ გვივარაუდია ისეთი გადამდები შტამი, როგორიც ომიკრონია. ამიტომ არ უნდა გავთამამდეთ მომავლის წინასწარმეტყველებაში”,- თქვა მან ზარზე.
Wellcome-მა და Bill & Melinda Gates Foundation-მა განაცხადეს, რომ შესაძლო ვარიანტებისა და მომავალი პანდემიის საფრთხეების შესახებ კვლევის მოსამზადებლად ერთობლივად $300 მილიონს გაიღებენ. თანხას მიიღებს ეპიდემიისთვის მზადყოფნის ინოვაციებისათვის კოალიციისთვის (CEPI), რომელიც ვაქცინების განვითარების ხელშეწყობაზე მუშაობს. CEPI-ს ხელმძღვანელი, რიჩარდ ჰეჩეტი ასევე ამბობს, რომ ჯერ კიდევ ნაადრევია პანდემიის მწვავე ფაზის დასრულების გამოცხადება. ოსლოში დაფუძნებული ჯგუფი ხუთი წლის წინ, ებოლას კრიზისის შემდეგ, რამდენიმე მთავრობისა და კერძო პირების მხარდაჭერით შეიქმნა.
CEPI მუშაობს ვაქცინების შემუშავებაზე, რომლებსაც შეუძლიათ ფართო დაცვა მრავალი კორონავირუსისგან. ჯგუფის $3,5-მილიარდიანი სტრატეგია ითვალისწინებს შეიქმნას ვაქცინების და სხვა აღჭურვილობის პროტოტიპის ბაზა, რომლითაც შესაძლებელი იქნება ვირუსების ათობით ოჯახისგან მომავალ საფრთხეებთან ბრძოლა და საჭიროების შემთხვევაში, ახალი ვაქცინის 100 დღის ვადაში შექმნა.
„არავის სჯერა იმის, რომ ომიკრონი იქნება ბოლო ვარიანტი და Covid-19 ბოლო პანდემია”,- თქვა ფარარმა.
ზოგიერთი ქვეყნის მთავრობამ იმედი გამოთქვა, რომ ომიკრონის სწრაფი გავრცელება და მისგან გამოწვეული ნაკლებად მძიმე შედეგები შესაძლოა პანდემიის დასრულების ნიშანი იყოს, თუმცა აშშ-ის პრეზიდენტის, ჯო ბაიდენის მთავარი სამედიცინო მრჩევლის, ენტონი ფაუჩის და ჯანდაცვის სხვა ექსპერტების განცხადებით, ნაადრევია იმის თქმა, იქნება თუ არა ომიკრონის ვარიანტი Covid-19-ის პანდემიიდან ენდემურ დონეზე გადასვლის მაცნე.
წყარო: Bloomberg, „ბიზნეს ფორმულა“