საქართველოს გენერალური აუდიტორის, ირაკლი მექვაბიშვილის განცხადებით, სახელმწიფო აუდიტის სამსახურმა ბოლო წლინახევრის განმავლობაში, სისხლის სამართლის ნიშნების არსებობის გამო, გენერალურ პროკურატურაში გამოსაძიებლად 30-მდე საქმე გააგზავნა.
როგორც ირაკლი მექვაბიშვილმა „ინტერპრესნიუსის“ კითხვის საპასუხოდ განაცხადა, ყველა საქმეზე გამოძიება მიმდინარეობს.
„ბოლო პერიოდში ჩვენ 270 აუდიტი გვაქვს ჩატარებული. ბოლო წელს ჩავატარეთ 50 აუდიტი. რაც შეეხება სისხლის სამართლის დანაშაულის ნიშნებს, თქვენ იცით, რომ ჩვენ მყისიერად ვრეაგირებთ და მასალებს ვაგზავნით პროკურატურაში. ბოლო 5 წლის გამავლობაში გაგზავნილი გვაქვს 130 კონკრეტული საქმე საგამოძიებო უწყებაში. მათ შორის, ბოლო წლინახევრის განმავლობაში გაგზავნილია 30-მდე საქმე. უკუკავშირი ბუნებრივია, გვაქვს. პრაქტიკულად, ყველა მიმართულებით არის აღძრული სისხლის სამართლის საქმეები და მიმდინარეობს გამოძიება“, - განაცხადა მექვაბიშვილმა.
ამასთან, ირაკლი მექვაბიშვილმა ჟურნალისტთან საუბრისას 5-წლიანი საქმიანობა შეაჯამა და იმ მიღწევებსა და გამოწვევებზე ისაუბრა, რაც აუდიტის სამსახურს აქვს.
როგორც გენერალური აუდიტორი ამბობს, საჯარო ფინანსების, ბიუჯეტის შესრულების და შესყიდვების მართვის კუთხით კვლავ რჩება გამოწვევები.
„აუდიტის სამსახურის მთავარი მიღწევა არის საერთაშორისო შეფასებები და საერთაშორისო აღიარება პრაქტიკულად ყველა მიმართულებით. სრული პასუხისმგებლობით შემიძლია გითხრათ, რომ სახელმწიფო აუდიტის სამსახურის ინსტიტუციური განვითარების დონე შეესაბამება ევროკავშირის ქვეყნების უმაღლესი აუდიტორული სამსახურების დონეს. ჩვენი 3.4 ქულა არის ზუსტად შესაბამისობაში ევროპულ ქვეყნებთან, რომელთა შეფასებები 3-სა და 3.5 ქულას შორის მერყეობს. ევროკავშირის სტანდარტებთან დაახლოების სურვილი პირნათლად არის შესრულებული“, - განაცხადა მექვაბიშვილმა.
რაც შეეხება სახელმწიფო აუდიტის სამსახურის მიერ გაცემული რეკომენდაციების შესრულებას, მექვაბიშვილის ინფორმაციით, ეს მაჩვენებელი 43%-ია.
„2008-ზე მეტი რეკომენდაცია გავეცით ბოლო 4 წლის განმავლობაში. რეკომენდაციების შესრულების მაჩვენებელი 43%-ზეა, რაც არ არის მაღალი მაჩვენებელი, თუმცა მნიშვნელოვანია შედეგი, რომელიც გვაქვს ამ რეკომენდაციების შესრულებიდან. მიმდინარე სტატუსში არის 30% და ჩვენი, მთავრობის და პარლამენტის ერთობლივად მუშაობაა საჭირო, რომ ეს 30%-იანი მიმდინარე სტატუსის მატარებელი რეკომენდაციები გადავიდეს შესრულებულ რეკომენდაციებში. ამ მიზნისთვის ჩვენ შევიმუშავეთ პროგრამა, რომელიც დაეხმარება, აუდიტის სამსახურს, მთავრობას და პარლამენტს ელექტრონულ სივრცეში განახორციელოს რეკომენდაციების შესრულების მონიტორინგი როგორც ცენტრალური აპარატის, ასევე მუნიციპალიტეტების დონეზე. ამ პროგრამის წარმატებით დანერგვა რეკომენდაციების შესრულების მაჩვენებლის ზრდას გამოიწვევს. არის რეკომენდაციები რომელიც სრულდება, არის რეკომენდაციები, რომელიც ვერ სრულდება ან არ სრულდება, ასევე არის რეკომენდაციები, რომელსაც სჭირდება საკანონმდებლო ინიციატივები“, - განაცხადა მექვაბიშვილმა.