უკრაინაში რუსეთის სამხედრო აგრესიის შემდეგ სანდო და ინფლაციის მიმართ მდგრად აქტივებზე მოთხოვნა გაიზარდა, რამაც საერთაშორისო ბაზრებზე ოქროს გაძვირებაც გამოიწვია. მიმდინარე წლის მარტის პირველ კვირაში 1 უნცია ოქროს ფასმა 2,000 დოლარს გადააჭარბა, რაც 2020 წლის შემდეგ პირველად მოხდა.
ექსპერტები ვარაუდობდნენ, რომ ზრდა გამოწვეული იყო რუსეთის უკრაინაში შეჭრით, რამაც ოქროს ფასს გეოპოლიტიკური პრემიუმი დაუმატა.
მაისში ოქროს ფასები 3-თვიან მინიმუმამდე შემცირდა და 1,800 დოლარს ჩამოსცდა. ამის მიზეზი ცენტრალური ბანკების მიერ მონეტარული პოლიტიკის გამკაცრება იყო ინფლაციის მაღალი დონის შესაკავებლად. როგორც წესი, ოქროს ფასის ვოლატილობა საპროცენტო განაკვეთების ზრდის მიმართ საკმაოდ მაღალია.
9 მაისს დოლარის ინდექსმა, რომელიც ექვსი სხვა ძირითადი ვალუტის კალათის მიმართ ამერიკული ვალუტის მდგომარეობას გვიჩვენებს, 20-წლიან მაქსიმუმს მიაღწია. ამ ფაქტმა სხვა აქტივების, მათ შორის, ოქროს ფლობა ნაკლებად მიმზიდველი გახადა.
რუსეთის მიერ წამოწყებული ომის გრძელვადიან, საერთაშორისო კონფლიქტში გადაზრდის რისკი ჯერ ისევ არსებობს, თუმცა ოქროს ფასი გარკვეულწილად მაინც გაიზარდა მაისის შემდეგ და დღეს 1,844 დოლარს აღწევს.
მიუხედავად იმისა, რომ ახლანდელი ფასი მარტის ფასთან შედარებით 10%-ით დაბალია, მაღალმა ინფლაციამ, გეოპოლიტიკური დაძაბულობამ და მოსალოდნელ რეცესიაზე გახშირებულმა საუბარმა, შესაძლოა, ოქროს ფასზე ზურგის ქარივით იმოქმედოს.
როგორც ძვირფასი მეტალების კონფერენციაზე აღინიშნა სინგაპურში, იმ ფონზე, რომ წამყვანი ბანკები ეკონომიკური შოკების საფრთხეზე მიუთითებენ, სტაგფლაციისთვის ნიადაგიც შემზადებულია და ამ ყველაფერმა ახლო მომავალში, შესაძლოა, ოქროს კიდევ უფრო გაძვირება გამოიწვიოს.
„წლების განმავლობაში მასიური დეფიციტური ხარჯვისა და მოშვებული მონეტარული პოლიტიკის შემდეგ, სამყარო სტაგფლაციისკენ მიემართება. ამ გარემოებაში საუკეთესო აქტივები, რომლის ფლობაც ადამიანს შეუძლია, ოქრო და ვერცხლია“, - ამბობს გრეგორ გრეგერსენი, Silver Bullion Pte.-ის დამაარსებელი Bloomberg-თან საუბრისას.
თუმცა, ოქროს ფლობას საპროცენტო განაკვეთების ზრდა ნაკლებად მიმზიდველს ხდის. აშშ-ს ცენტრალური ბანკი საპროცენტო განაკვეთების ზრდას ივნისსა და ივლისში აპირებს, ევროპის ცენტრალური ბანკი კი იმავე საკითხთან დაკავშირებით შეხვედრას ამ კვირაში გეგმავს.
რაც შეეხება სხვა ძვირფას მეტალებს, 1 უნცია ვერცხლის ფასიც ოქროს მსგავსად მარტში გაიზარდა და 26.5 დოლარს მიაღწია, დღეს კი თითქმის 17%-ით ნაკლები, 22 დოლარია. 7 ივნისისთვის 1 უნცია პლატინა 1,014 დოლარამდე ღირს, პალადიუმი კი 2,028 დოლარამდე.