ქართველი მაშველების საქართველოში დაბრუნება ბიუჯეტს 71 148 ლარი დაუჯდა, სწორედ ამდენი გადაუხადეს Georgian Airways-ს ჩარტერულ რეისში, რომელიც მან თბილისი-ანკარა-თბილისის საჰაერო ხაზზე განახორციელა.
როგორც სახელმწიფო შესყიდვების სააგენტოს ვებგვერდზე შსს-ს საგანგებო სიტუაციების მართვის სამსახურის წერილიდან ირკვევა, რომლითაც უწყებამ სახელმწიფო შესყიდვების სააგენტოს გამარტივებული შესყიდვის მოთხოვნით გაუგზავნა, ჩარტერული ავიარეისის დანიშვნის აუცილებლობა მეხანძრეების ფიზიკური მდგომარეობის გათვალისწინებით მოხდა, რადგან ისინი სამძებრო-სამაშველო ღონისძიებებს ახორციელებდნენ შეუცვლელად/უწყვეტად მიმდინარე წლის 6 თებერვლიდან 24 თებერვლის ჩათვლით
„შექმნილ მდგომარეობა შეფასდა, როგორც გადაუდებელ აუცილებლობად და სახელმწიფო შესყიდვების სააგენტოს თავმჯდომარის 2015 წლის 17 აგვისტოს N13 ბრძანებით დამტკიცებული ,,გამარტივებული შესყიდვის კრიტერიუმების განსაზღვრისა და გამარტივებული შესყიდვის ჩატარების წესის“ მე-3 მუხლის პირველი პუნქტის ,,ბ“ ქვეპუნქტის შესაბამისად განვახორციელეთ საჰაერო ტრანსპორტით მომსახურების შესყიდვა ღირებულებით 71 148 ლარი“, აღნიშნულია საგანგებო სიტუაციების მართვის სამსახურის წერილში.
როგორც შსს-ს ვებგვერდზე განთავსებული ინფორმაციიდან ვიგებთ, პრემიერ-მინისტრის, ირაკლი ღარიბაშვილის გადაწყვეტილებით, ქართველი მაშველები თურქეთიდან სამშობლოში სპეციალური ჩარტერული რეისით ჩამოფრინდნენ.
შინაგან საქმეთა სამინისტროს საგანგებო სიტუაციების მართვის სამსახურის მაშველებმა თურქეთში მიწისძვრის შედეგების სალიკვიდაციო და სამაშველო მისია დაასრულეს.
საქართველოში დაბრუნებულ მაშველებს თბილისის საერთაშორისო აეროპორტში დახვდნენ შინაგან საქმეთა მინისტრის მოადგილე - იოსებ ჭელიძე, საგანგებო სიტუაციების მართვის სამსახურის უფროსი - თეიმურაზ მღებრიშვილი და თურქეთის საგანგებო და სრულუფლებიანი ელჩი საქართველოში - ალი ქაან ორბაი, რომლებმაც სამაშველო ჯგუფის წევრებს თურქეთში გამოჩენილი თავდადებისთვის მადლობა გადაუხადეს.
ქართველ მაშველთა ნაწილი, სამაშველო აღჭურვილობითა და ტექნიკით, სახმელეთო გზით დაბრუნდება სამშობლოში.
სამინისტროს საგანგებო სიტუაციების მართვის სამსახურის მაშველები თურქეთში, ქალაქ ადიამანში, სტიქიის პირველივე დღეს გაემგზავრნენ, როტაციის შემდეგ კი ჰათაის პროვინციის ქალაქ ანთაქიაში განაგრძეს სამაშველო ოპერაცია.
საერთო ჯამში, მიწისძვრის შედეგების სალიკვიდაციო და სამაშველო ღონისძიებებში 200-მდე მაშველი მონაწილეობდა.