შრომის უსაფრთხოებისა და ჯანმრთელობის დაცვის საკონსულტაციო კომპანიის სერვისებზე მოთხოვნა პანდემიურ პერიოდში განსაკუთრებით გააქტიურდა. მართალია, კოვიდ19-ის გავრცელების პირობებში კომპანიების ნაწილი კოტრდება და ისინი დროებით ან სამუდამოდ აჩერებენ საქმიანობას, თუმცა მზარდია მათი რაოდენობა, რომლებიც პოზიციებს იუმჯობესებენ და უსაფრთხოების სტანდარტის შესაბამისად აგრძელებენ ოპერირებას. მიმდინარე პერიოდში კი ბიზნესი მთავარ გამოწვევად მაღალ ინფლაციას ასახელებს.

როგორც GeoSafety-ის დამფუძნებელი კახა დათიაშვილი ,,კომერსანტთან“ აცხადებს, პროდუქტებზე ფასები მუდმივად იცვლება და დროულად ვერ ახდენენ ლარში ფიქსაციას, რაც სხვადასხვა კომპანიებთან ურთიერთობისას გარკვეულ დისკომფორტს ქმნის.

როგორც აღმოჩნდა, შრომის უსაფრთხოებისა და კოვიდრეგულაციებიდან გამომდინარე, მოთხოვნა მუდმივად მატულობს და წინა წელთან შედარებით ზრდამ დაახლოებით 40% შეადგინა.

,,კოვიდრეგულაციებთან დაკავშირებით კომპანიებს ვუწევთ კონსულტაციებს, ვატარებთ დეზინფექციას, რასაც ემატება შრომის უსაფრთხოებასთან დაკავშირებული ღონისძიებები, რომელსაც შემდეგში  შრომის ინსპექცია ამოწმებს. მუდმივად იცვლება რაღაც, ინერგება სიახლეები, მოთხოვნა არის და ეს განაპირობებს შრომის უსაფრთხოების კომპანიების მიმართ მოთხოვნის ზრდას. ყველა ცდილობს, იმუშაოს სტანდარტის დაცვით, არ დაჯარიმდეს, არ მოხდეს კლასტერი, რისთვისაც კოვიდრეგულაციების დაცვას ძალიან დიდი მნიშვნელობა აქვს. თუმცა, ქვეყანაში მაღალი ინფლაციაა, ფასები იცვლება და რთულია ამ პირობებში მუშაობა“, - ამბობს კახა დათიაშვილი.

რაც შეეხება ფასებს, ჰიგიენის საშუალებები ერთ-ერთია ბაზარზე, სადაც ფასების კლება ფიქსირდება, თუმცა ხშირია საფასო რყევები, რაც სტაბილურობაზე ნეგატიურად აისახება.

,,ფასები იცვლება მუდმივად,  ლარში დროული ფიქსაცია ამის გამო საკმაოდ ჭირს. ვერ გაერკვა ბიზნესი, რა ფიქსირებული ხარჯი ჰქონდეს. არის სერვისები, სადაც  შარშანდელთან შედარებით, მომსახურების საფასური არ შეცვლილა. ხოლო ჰიგიენური პროდუქცია, მათ შორის,  პირბადე, ხსნარი და სხვა, გაიაფდა კიდეც. მაგალითად, 2020 წლის პირველ კვარტალში 1 პირბადე 1,8 ლარი ღირდა,  დღეს 10 თეთრამდეა გაიაფებული. ზოგ შემთხვევაში კი ფასების 2-ჯერადი კლებაა. თავიდან ყველაფერი ძვირი იყო, ერთჯერადი სამედიცინო  ხალათების ღირებულება იგივე დარჩა. საერთო ჯამში, კრიზისი ჩვენს სექტორს არ შეხებია, პირიქით, 200 კომპანია დაგვემატა. დაახლოებით 40%-ის ფარგლებში გაიზარდა მოთხოვნა, ძირითადად მცირე მეწარმეები მოგვმართავენ, რაც შრომის უსაფრთხოების მიმართულებით კონტროლის გაძლიერებას უკავშირდება“, - ამბობს კახა დათიაშვილი.

რაც შეეხება პანდემიური პერიოდის გამოწვევას, როგორც კომპანიის ხელმძღვანელი აღნიშნავს, აკრედიტაცია დიდი ხანია გაჩერებულია, პანდემიურმა პერიოდმა ეს პროცესი უფრო მეტად გაწელა, რის გამოც ვერ ხერხდება დროულად შრომის ინსპექტორების გადამზადება.

კადრების საკითხთან დაკავშირებით კახა დათიაშვილი ამბობს, რომ დეფიციტი არ შეიმჩნევა, პირიქით, GeoSafety-ს ემსახურება კვალიფიციური კადრები და რამდენიმე ახალი წევრი, რომელთა გამოცდილებასა და პროფესიული უნარ-ჩვევების ამაღლებაზე თვითონ კომპანია ზრუნავს.

ამ ეტაპზე კომპანიაში 40 ადამიანია დასაქმებული.

GeoSafety არის შრომის უსაფრთხოებისა და ჯანმრთელობის დაცვის საკონსულტაციო კომპანია, რომელიც მომხმარებელს სთავაზობს სრულ მომსახურებას შრომის უსაფრთხოების მიმართულებით.

მისი შექმნა ბაზარზე შრომის უსაფრთხოების სპეციალისტების ნაკლებობამ და მოხშირებულმა ინციდენტებმა განაპირობა.

კომპანია მიზნად ისახავს, მთლიანი ქვეყნის მასშტაბით, საწარმოს ტიპის კომპანიებს მოემსახუროს, შეაფასოს მათი შრომითი პროცესები, გააანალიზოს რისკები და შესთავაზოს ინდივიდუალური, მათზე მორგებული გადაწყვეტილებები.

მარი ჩიტაია