გერმანია არ შეუერთდება ბირთვული იარაღის აკრძალვის ხელშეკრულებას, სანამ არსებობს მისი გამოყენების საფრთხე გერმანიისა და NATO-ს სხვა ქვეყნების წინააღმდეგ. ასე უპასუხა მთავრობამ ოპოზიციური „მემარცხენეების“ დეპუტატის მოთხოვნას.
მანამდე „მემარცხენეების“ წევრმა, ბუნდესტაგის დეპუტატმა სევიმ დაგდელენმა მთავრობას მიმართა შეკითხვით ბირთვული განიარაღების შესახებ ხელშეკრულებასთან გერმანიის მიერთების თაობაზე. საპასუხოდ მინისტრთა კაბინეტმა განაცხადა, რომ მხარს უჭერს ბირთვული იარაღისგან თავისუფალ მსოფლიოს, მაგრამ მოცემულ მომენტში ასეთი ნაბიჯი გამორიცხულია.
„განიარაღება უნდა განხორციელდეს უსაფრთხოების პოლიტიკის სფეროში არსებული ვითარების გათვალისწინებით. ჯერჯერობით, სანამ გერმანიისა და მისი მოკავშირეების მიმართ ბირთვული იარაღის გამოყენების საფრთხე არსებობს, NATO-ს ფარგლებში მტკიცე ბირთვული შეკავების აუცილებლობა შენარჩუნებულია“, - მიაჩნია გერმანიის მთავრობას.
კაბინეტში ასევე ფიქრობენ, რომ უკრაინაზე რუსეთის თავდასხმა მეტყველებს საფრთხეზე, რომელსაც რუსეთი წარმოადგენს თავისი ბირთვული პოტენციალით არა მხოლოდ უკრაინისთვის, არამედ ევროპისა და მსოფლიოსთვის, ამიტომ ბირთვულ შეკავებაზე უარის თქმა შეცდომა იქნებოდა.
თავად ბირთვული იარაღი გერმანიას არ მოეპოვება, მაგრამ NATO-სთან თანამშრომლობის ფარგლებში მის ტერიტორიაზე ამერიკის ბირთვული ქობინებია განლაგებული.
ბირთვული იარაღის აკრძალვის ხელშეკრულება 2021 წლის იანვარში შევიდა ძალაში. დოკუმენტი კრძალავს ბირთვული იარაღის შექმნას, გამოცდას, შენახვას, შეძენას, ტრანსპორტირებასა და გამოყენებას. ხელშეკრულებას უკვე შეუერთდა 65 ქვეყანა, მაგრამ მათ შორის არ არიან „ბირთვული კლუბის“ წევრები: აშშ, რუსეთი, ჩინეთი, დიდი ბრიტანეთი, საფრანგეთი, ინდოეთი, პაკისტანი, კორეის სახალხო-დემოკრატიული რესპუბლიკა და ისრაელი (ამ ქვეყნის ხელისუფლებას ოფიციალურად არ უღიარებია, რომ ბირთვულ იარაღს ფლობს). ამ დღეებში ვენაში ტარდება ხელშეკრულების მონაწილე ქვეყნების პირველი კონფერენცია.
წყარო: www.radiotavisupleba.ge