ენერგოკრიზისის მიუხედავად, მაშინ როცა მთელი ევროპა რუსული გაზის ალტერნატივას ეძებს, გერმანია გაჩერებული ატომური ელექტროსადგურების ხელახლა ამუშავებას არ გეგმავს. ამის შესახებ ინფორმაციას გერმანიაში დაფუძნებულ ენერგეტიკული კომპანია EON-ის აღმასრულებელ დირექტორ ლეო ბინრნაბაუმის განცხადებაზე დაყრდნობით Financial Times ავრცელებს.

გერმანიამ ბირთვული ენერგიის გამოყენებაზე უარი 2011 წლის ფუკუშიმას ტრაგედიის შემდეგ განაცხადა. მიუხედავად იმისა, რომ ცუნამის საფრთხე არც ჩრდილოეთის ზღვიდან და არც ბალტიის ზღვიდან არ მომდინარეობს, 11 წლის განმავლობაში ქვეყანას სტრატეგია არ შეუცვლია. ამჟამად 3 ატომური ელექტროსადგურია დარჩენილი, რომელთაგანაც 1 წლის ბოლომდე უნდა დაიხუროს. მთელი ამ პერიოდის განმავლობაში, პარალელურად მცირდებოდა ნახშირის მოხმარებაც. ქარისა და მზის ელექტროსადგურების რაოდენობა კი იზრდებოდა, მაგრამ მზარდ მოთხოვნას ვერ ეწეოდა, რაც რუსულ გაზზე დამოკიდებულების გაზრდას იწვევდა.

დეფიციტის აღმოსაფხვრელად გერმანია გერმანია გაზის შესყიდვას ახალი ბაზრებიდან ცდილობს, ახლახანს გათხევადებულ აირთან დაკავშირებით ხელშეკრულება ყატართან გაფორმდა. დამატებით მიმწოდებლად შეიძლება ნორვეგია და აშშ იქნას განხილული. იტალია გამოსავალს ალჟირულ გაზში ეძებს.

ატომურ ბომბს სულ 9 სახელმწიფო ფლობს, ელექტროენერგიის მისაღებად ბირთვულ ენერგიას კი 35 ქვეყანა იყენებს, მათგან ყველაზე მეტ 790 მლრდ კვტ/სთ-ს აშშ გამოიმუშავებს, პროცენტულად ყველაზე მეტს - 70%-ს კი საფრანგეთი. გერმანიაში მისი წილი 11%-ა.

რუსეთის უკრაინაში შეჭრის შემდეგ, მოსკოვს მკაცრი სანქციები დაუწესდა, თუმცა მათში ენერგეტიკული სფერო ვერ მოხვდა. რუსული ნავთობისა და გაზის იმპორტი ამ დრომდე მხოლოდ შეერთებულმა შტატებმა და კანადამ აკრძალა. ევროკავშირი ჯერჯერობით ქვანახშირის ემბარგოს დასჯერდა, თუმცა შემდეგი ნაბიჯი შეიძლება სწორედ რუსეთიდან ენერგორესურსების იმპორტის აკრძალვა იყოს.