გერმანიის საელჩო შეერთებულ შტატებში ოფიციალურ ვაშინგტონს გაზსადენ „ჩრდილოეთის ნაკადი-2“-ის წინააღმდეგ სანქციების შემოღებისგან თავის შეკავებას მოუწოდებს.

ოფიციალური ბერლინი ვაშინგტონს აფრთხილებს, რომ მილსადენის ან მასთან დაკავშირებული კომპანიების წინააღმდეგ სანქციების დაწესება „აშშ-ს მიმართ ნდობას დაასუსტებს და საბოლოო ჯამში, ტრანსატლანტიკურ თანამშრომლობას ზიანს მიაყენებს“.

მიმართვაში ასევე ნათქვამია, რომ ამ ეტაპზე პროექტი უკრაინისთვის საფრთხეს არ წარმოადგენს, რადგანაც „გონივრული ტრანზიტი მისი ტერიტორიის გავლით“ გარანტირებულია.

გერმანიის მთავრობის აზრით, აშშ-ის სანქციები გაზსადენის წინააღმდეგ ვლადიმერ პუტინის გამარჯვება იქნება, რადგანაც ეს შეზღუდვები დასავლელ მოკავშირეებს შორის ურთიერთობებს გააუარესებს.

დოკუმენტში ასევე ნათქვამია, რომ გერმანია მზადაა შეასრულოს ამერიკასთან ერთად მიღებული გადაწყვეტილება, რომელიც უკრაინის მხარდაჭერას და რუსეთის მიერ გაზსადენის პოლიტიკური მიზნებით გამოყენების თავიდან აცილებას გულისხმობს.

 „აშშ-ის ცალმხრივ ქმედებებს ამ ძალისხმევის შერყევა და რუსეთთან მიმართებაში ტრანსატლანტიკური ერთობის შესუსტება შეუძლია“, - აღნიშნულია მიმართვაში.

გერმანიის მთავრობის მიმართვაში ნათქვამია, რომ „ჩრდილოეთი ნაკადი-2“-ის მხარდაჭერამ არანაირად არ შეარბილა ბერლინის პოლიტიკა რუსეთისადმი და ამავე დროს ენერგომატარებლების გაძვირება გლობალური მოვლენაა და ის მხოლოდ რუსეთთან დაკავშირებული ვერ იქნება.

ასევე დოკუმენტში ჩამოთვლილია ნაბიჯები, რომლებსაც გერმანიის მთავრობა გადადგამს - მათ შორისაა რუსეთის ქმედებების დაგმობა ფედერალურ დონეზე, რუსეთთან ურთიერთობების რამდენიმე ორმხრივი ფორმატის გადახედვა და სამომავლოდ ნავთობმოპოვების შეზღუდვის შესაძლებლობების განხილვა.

რესპუბლიკელი სენატორები აშშ-ის თავდაცვით ბიუჯეტში რუსეთის და „ჩრდილოეთის ნაკადი-2“-ის წინააღმდეგ სანქციების შემოღებას მოითხოვენ. დოკუმენტი ამჟამად კონგრესის წარმომადგენელთა პალატაში განიხილება.

თუ სენატორების შესწორება მიღებული იქნება, ეს ნიშნავს სანქციების დაწესებას ნებისმიერი კომპანიის წინააღმდეგ, რომელიც გაზსადენის დაპროექტებაში, დაგეგმარებაში, მშენებლობაში და ექსპლუატაციაში მონაწილეობს.

სანქციების შემოღება გაზსადენის მმართველი კომპანიის Nord Stream 2 AG-ს წინააღმდეგაც იგეგმება. ამ დროისთვის დემოკრატები და რესპუბლიკელები ამ საკითხზე ვერ თანხმდებიან - რესპუბლიკელების ინიციატივას დემოკრატები ეწინააღმდეგებიან და მათ მიერ მომზადებულ პროექტში რუსეთის და „ჩრდილოეთის ნაკადი-2“-ის წინააღმდეგ შეზღუდვები საერთოდ ნახსენები არაა.

რესპუბლიკელები ბიუჯეტის განხილვაზე უარს ამბობენ და აცხადებენ, რომ სანქციების გარეშე ისინი დოკუმენტს მხარს არ დაუჭერენ.

axios.com