გერმანია მზად არის მიიღოს ახალი კანონი, რომელიც უცხოელებს გერმანიის მოქალაქეობის მიღებას გაუადვილებს, რაც მიზნად ისახავს ქვეყნის შემცირებული სამუშაო ძალის გაზრდას. ინფორმაციას CNBC ავრცელებს.

კანონპროექტი, რომელიც დეპუტატებს უახლოეს თვეებში წარედგინება, საშუალებას მისცემს მოქალაქეობაზე განაცხადი გერმანიაში ცხოვრების 5 წლის გასვლის შემდეგ გააკეთონ, ნაცვლად 8 წლისა. მათ, ვინც განსაკუთრებული ძალისხმევა გამოიჩინეს ინტეგრაციისთვის, მაგალითად, გერმანული ენა შეისწავლეს, მოქალაქეობის მიღებას 3 წელში შეეძლებათ.

ახალი კანონპროექტის მიხედვით, არაევროკავშირის ქვეყნებიდან მიგრანტებისთვის ორმაგი მოქალაქეობის შეზღუდვაც მოიხსნება. რაც იმას ნიშნავს, რომ მათ აღარ მოუწევთ თავიანთი ქვეყნის ეროვნების დათმობა. ამჟამად, მხოლოდ ევროკავშირის პასპორტის მქონე პირებს ან მათ, ვისაც ერთი მშობელი ჰყავთ გერმანიიდან, შეუძლიათ მიიღონ გერმანიის მოქალაქეობა.

იმავდროულად, საიმიგრაციო რეფორმა კანადის ქულების სისტემას ეფუძნება, რაც  კვალიფიციურ მუშაკებს ქვეყანაში შესვლას გაუადვილებს და აღარ იქნება საჭირო გერმანიაში აღიარებული პროფესიული კვალიფიკაციის სერტიფიკატი. ამის ნაცვლად, საკმარისი იქნება სამუშაო გამოცდილების ქონა.

სოციალურად პროგრესული პოლიტიკის მიზანი, მოსახლეობის დაბერებისა და შრომის დეფიციტის დასაბალანსებლად, ყოველწლიურად 400 000 კვალიფიციური უცხოელი მუშახელის მოზიდვაა.

„გერმანია, ისევე როგორც ბევრი სხვა ქვეყანა დღეს, განიცდის უზარმაზარ დემოგრაფიულ ზეწოლას და მიზნად ისახავს უფრო მაღალკვალიფიციური მუშაკების მიღებას, რათა შეცვალოს დაბერებული მოსახლეობა“, — განუცხადა CNBC-ს მიგრაციის პოლიტიკის ინსტიტუტის ასოცირებულმა დირექტორმა ნატალია ბანულესკუ-ბოგდანმა.