გერმანიის სარკინიგზო სატვირთო გადაზიდვების ოპერატორი DB Cargo აწარმოებს მოლაპარაკებებს უკრაინის, პოლონეთის, ჩეხეთის, სლოვაკეთის და რუმინეთის სარკინიგზო ადმინისტრაციებთან ე.წ. „ხორბლის ხიდის“ შექმნასთან დაკავშირებით. ამის შესახებ სარკინიგზო ჟურნალი Railway Supply იუწყება.
როგორც პორტალი წერს, ვინაიდან რუსებს ბლოკირებული აქვთ უკრაინის პორტები, აუცილებელია საზღვაო ტრანსპორტის ჩანაცვლება სარკინიგზო ტრანსპორტით. საუბარია დაახლოებით 20000 მატარებლის მიმოსვლის უზრუნველყოფაზე, რათა უკრაინული ხორბალი გადაიზიდოს ადრიატიკის ან ჩრდილოეთის ზღვის პორტებამდე, იქიდან კი გემებით რეგიონებში, სადაც მოთხოვნილებაა ამ პროდუქტზე.
როგორც გამოცემა აღნიშნავს, DB Cargo გეგმავს ომის დროს უკრაინაში სოფლის მეურნეობის წარმოების დახმარებას და საზღვაო ტრანსპორტის ნაკლებობის შეცვლას (პორტები დაბლოკილია რუსეთის მიერ). Deutsche Bahn-ის სპიკერმა დაადასტურა, რომ "ამის გეგმები არსებობს".
ინდუსტრია 20000-მდე მატარებლის მაჩვენებელზე საუბრობს. თითოეულ მათგანს შეუძლია 52-მდე კონტეინერის ან რამდენიმე ათასი ტონა ტვირთის გადატანა.
გეგმა ასევე არის ევროკომისიასთან და გაეროსთან მოლაპარაკებების ნაწილი. გაეროს გენერალურმა მდივანმა ანტონიო გუტერეშმა უკვე გააფრთხილა მსოფლიო უკრაინაში რუსეთის შეჭრის გამო შიმშილის საფრთხეზე.
ეგრეთ წოდებულ მარცვლოვან ხიდს ორი ასპექტი აქვს: ერთის მხრივ, მიწოდება გადამისამართებულია საზღვაო ტრანსპორტიდან რკინიგზაზე. მეორე მხრივ, უკრაინამ დაიწყო თესვის კამპანია, რისთვისაც სჭირდება სასოფლო-სამეურნეო ტექნიკა (სათადარიგო ნაწილებიდან ახალ ტრაქტორებამდე), მარცვლეულის კომბაინები და ა.შ.
უკრაინულ მარცვლეულზე დიდადაა დამოკიდებული ისეთი ქვეყნები, როგორიცაა ეთიოპია, ლიბანი და ინდონეზია.
გერმანიის ფედერალურმა მთავრობამ ახლა დაამტკიცა 430 მილიონი ევრო გლობალური შიმშილის კრიზისის საპასუხოდ.
შეგახსენებთ, რომ DB Cargo-მ უკრაინაში ჰუმანიტარული ტვირთით „რკინიგზის ხიდი“ გაუშვა.