გერმანიაში ძარცვის მიზნით ბანკომატების აფეთქების რაოდენობით გასული წელი რეკორდული იყო, რის გამოც ოფიციალური პირები მსგავსი დანაშაულის თავიდან ასაცილებლად დამატებით ზომებზე ფიქრობენ. ინფორმაციას Spiegel ავრცელებს.

ფედერალური კრიმინალური პოლიციის მონაცემებით, 2022 წელს ბანკომატების აფეთქების 500-მდე შემთხვევა დაფიქსირდა, რაც რეკორდული მაჩვენებელია. კერძოდ, 2021 წელს 392, ხოლო 2020 წელს 414 ასეთ შემთხვევას ჰქონდა ადგილი.

შექმნილ ვითარებში ფედერალური და ადგილბრივი მთავრობები კრიმინალების ინტერესის შესამცირებლად ბანკომატების დამცავ ზომებზე ფიქრობენ, როგორიც არის დამცავი კვამლის სისტემა ან ფიზიკური ჩარევისას ბანკომატში ფულის შეწებება ან შეღებვა.

შინაგან საქმეთა მინისტრი, ნენსი ფეიზერი აცხადებს, რომ თუ აღნიშნულ ტენდენციას თავად ბანკები ადეკვატურად არ უპასუხებენ და დაცვის სისტემებს არ გაიუმჯობესებენ, ეს პირობა კანონმდებლობით გახდება სავალდებულო. თუმცა საბანკო სექტორის წარმომადგენლების შეფასებით, უცნაური მიდგომაა, როცა დანაშაულის პრევენციაზე მთავარ პასუხისმგებლობას თავად ბანკებს აკისრებენ.

ადრე ვრცელდებოდა ინფორმაცია, რომ ბოროტმოქმედი ამფეთქებლები, ძირითადად, მეზობელი ნიდერლანდების მოქალაქეები არიან.

ევროკავშირის საპოლიციო სამსახური, Europol მიიჩნევს, რომ ევროპაში ბანკომატების აფეთქებებს ორგანიზებული კრიმინალური დაჯგუფებები ეწევიან. ისინი ადამიანებს ასაფეთქებელ ნივთიერებებთან მუშაობას ასწავლიან, რომლებიც შემდეგ ავტომობილებით გადაადგილდებიან და ბანკომატებზე სერიულ თავდასხმებს ახორციელებენ.

ბელგიამ, გერმანიამ და ნიდერლანდებმა ასეთი კრიმინალური ქსელი თებერვალში გამოავლინა.

bpn.ge