უკრაინაში რუსეთის სრულმასშტაბიანი შეჭრიდან, ევროკავშირის სანქციების სიაში შემავალი რუსი ოლიგარქებისა და სხვა პირების გერმანიაში გაყინული აქტივების მთლიანი ოდენობა, დაახლოებით, 143 მლნ ევროს შეადგენს. ინფორმაციას Spiegel-ი ავრცელებს.
გერმანიის ფინანსთა ფედერალური სამინისტროს მონაცემებით, თებერვლის ბოლოს ქვეყანაში მხოლოდ 342 000 ევროს რუსული აქტივები იყო გაყინული, მაშინ, როცა 23 მაისის მდგომარეობით ამ თანხამ 142 990 409 ევრო შეადგინა.
უწყების ცნობით, გერმანიაში რუსული აქტივების გაყინვის საფუძველი ევროკავშირის რეგლამენტია, რომელიც 2014 წელს, მას შემდეგ მიიღეს, რაც რუსეთმა უკრაინის ნახევარკუნძულ ყირიმის ანექსია მოახდინა.
მედიით გავრცელებული სავარაუდო მონაცემებით, ევროკავშირის მიერ სანქცირებული რუსი ოლიგარქების გაყინული აქტივების მთლიანი ღირებულება, დაახლოებით, 10 მლრდ ევროს შეადგენს. მანამდე ევროკომისიის პრეზიდენტ ურსულა ფონ დერ ლაიენმა გაყინული აქტივების უკრაინის სასარგებლოდ გამოყენება არ გამორიცხა.
25 მაისს ევროკომისია გამოვიდა ინიციატივით, რომ სანქციების დარღვევის ფაქტი ევროკავშირის ტერიტორიაზე ჩადენილ დანაშაულთა სიას დაემატოს. კომისია, ასევე, აქტივების დაბრუნებისა და კონფისკაციის წესების გამკაცრებას ემხრობა, რაც ევროკავშირის შემზღუდავი ზომების გატარებას ხელს შეუწყობს.
ახლახან გერმანიის ფინანსთა მინისტრ კრისტიან ლინდნერმა განაცხადა, რომ გერმანია მზად არის, აქტივების კონფისკაციის საკითხი განიხილოს, თუმცა ამ პროცესში სახელმწიფო და კერძო სახსრები ერთმანეთისგან უნდა განასხვავონ და გაითვალისწინონ გერმანიის კონსტიტუციაც, რომელიც კერძო აქტივების დაცვის გარანტიებს იძლევა.
აქტივები
