გერმანიის კანცლერმა ოლაფ შოლცმა ინდოეთის პრემიერ-მინისტრი ნარენდრა მოდი ივნისში გასამართ G7-ის სამიტზე მიიწვია. ინდოეთი ჩინეთის მსგავსად რუსეთის წინააღმდეგ დაწესებულ სანქციებს არ შეერთებია. დელის პოზიციის შესაძლო ცვლილება მოსკოვისთვის არასასურველი სიურპრიზი იქნება.
ინდოეთი 3-4 წელიწადში მოსახლეობის რაოდენობით ჩინეთს გაუსწრებს და 1-ელ ადგილს დაიკავებს. 1 სულ მოსახლეზე ძალიან დაბალი შემოსავლის მიუხედავად, სწრაფად მზარდია მისი მშპ-ც. ინდოეთის ეკონომიკა 2021 წლის მდგომარეობით $3 ტრლნ-ს შეადგენს მეექვსე ადგილს იკავებს, უსწრებს საფრანგეთს და სულ მცირედით ჩამორჩება ბრიტანეთს. ათწლეულის ბოლოსთვის მოსალოდნელია, რომ აზიურმა გიგანტმა გერმანია და იაპონიაც უკან ჩამოიტოვოს. ეკონომიკის ზრდის პარალელურად ნელ-ნელა ინდოეთის პოლიტიკური წონაც გაიზრდება, რომელიც 1974 წლიდან ბირთვული კლუბის წევრია.
საქართველო რეგიონში ერთადერთი ქვეყანაა, რომელსაც თავისუფალი ვაჭრობის ხელშეკრულება ერთდროულად ჩინეთთანაც აქვს და ევროკავშირთანაც. პარალელურად შეერთებულ შტატებთან, ინდოეთთან, კორეასთან და იაპონიასთან ანალოგიური ხელშეკრულების გასაფორმებლად მოლაპარაკებებს აწარმოებს.
ჩინეთთან გაფორმებული თავისუფალი ვაჭრობის ხელშეკრულების შემდეგ, ექსპორტი სწრაფად გაიზარდა. 2020 წლიდან ქვეყანა საქართველოსთვის #1 საექსპორტო პარტნიორია, მიმდინარე წლის მარტში კი ჩინეთთან უარყოფითი სავაჭრო ბალანსი დადებითით შეიცვალა. განსხვავებული ვითარებაა ინდოეთის მიმართულებით. სავაჭრო ბრუნვის მოცულობამ ინდოეთთან 2022 წლის პირველ კვარტალში ჩინეთთან შედარებით თითქმის 15-ჯერ ნაკლები - $30 მლნ შეადგინა. თუმცა ისიც უნდა აღინიშნოს, რომ თუ შარშან მთელი წლის მანძილზე ექსპორტმა მხოლოდ $3 მლნ შეადგინა, წელს პირველ 3 თვეში მან $12 მლნ-ს გადააჭარბა. ინდოეთში ექსპორტმა მაქსიმალურ $22 მლნ-იან მაჩვენებელს 2016 წელს მიაღწია, იმავე წელს $78 მლნ-ს მიაღწია იმპორტმაც, რაც ასევე რეკორდული მონაცემია.