გერმანიის ზოგიერთი უმსხვილესი კომპანია ვაქცინირებულ და კორონავირუსისგან გამოჯანმრთელებულ თანამშრომლებს ცალკე სასადილოებს შესთავაზებს.
გერმანული გამოცემა Rheinishe Post-ის ცნობით, ფარმაცევტულ გიგანტ Bayer-ს, ენერგეტიკულ კომპანია Eon-სა და ტურისტულ კომპანია Alltours-ს ვაქცინირებული თანამშრომლებისთვის ცალკე სასადილოები ექნებათ.
ვაქცინირებული და გამოჯანმრთელებული პირები ასეთ სასადილო ზონებში კვებას ნორმალურ პირობებში შეძლებენ, არავაქცინირებულებს და იმ პერსონალს, ვინც აცრის სტატუსს არ ასაჯაროვებს, სოციალური დისტანციის წესების დაცვა და ნიღბების ტარება მოუწევთ.
კომპანია Bayer თავის ოფისებში რამდენიმე საპილოტე პროექტს განიხილავს. Bayer ხაზს უსვამს, რომ არავაქცინირებულ ადამიანებს სასადილოებზე წვდომა ექნებათ, თუმცა შეზღუდვების დაცვით. კომპანიაში აცხადებენ, რომ საპილოტე პროექტები პერსონალის წარმომადგენლებთან მჭიდრო თანამშრომლობით იგეგმება.
ფარმაცევტული კომპანიის თანამშრომლებმა უკვე დაიწყეს სამუშაო ჯგუფების შექმნა, რაშიც არავაქცინირებული პერსონალი ვერ მონაწილეობს.
„თვითორგანიზებულ ჯგუფებს მრავალკაციან შიდა ან ღია დაგეგმვის ოფისებში, ლაბორატორიებსა და საწარმოო ობიექტებში შეუძლიათ, ერთად იმუშაონ დისტანცირებისა და ნიღბების ტარების გარეშე, რასაც 2G-ის, Geimpfte-ისა და Genesene-ის ანუ ვაქცინირებულებისა და გამოჯანმრთელებულების წესები ითვალისწინებს,“ - ნათქვამია კომპანიის განცხადებაში.
bpn.ge