გერმანული ავტომწარმოებლები, რომელთა შორის არიან BMW და Audi, უარს ამბობენ რუსეთის რკინიგზის გამოყენებაზე საკუთარი ავტომობილების ჩინეთში ექსპორტირებისთვის. იაპონური სააგენტო Nikkei საკუთარ წყაროზე დაყრდნობით წერს, რომ შექმნილი გეოპოლიტიკური სიტუაციის გამო, კომპანიები უარს ამბობენ ახალი აბრეშუმის გზის გამოყენებაზე, შედეგად კი ისინი ჩინეთში ექსპორტს ბრემერჰაფენის პორტიდან განახორციელებენ.

მიუხედავად იმისა, რომ ევროპულ პრემიუმ კლასის ავტომწარმოებლებს საკუთარი საწარმოები დიდი ხანია აქვთ ჩინეთში, მათ მაინც უწევდათ გარკვეული რაოდენობის ავტომობილების შეტანა ცისქვეშეთში. Nikkei-ის ცნობით, მაგალითისთვის BMW-მ გასულ წელს ჩინეთში 846 237 ავტომობილი გაყიდა, საიდანაც ევროპიდან 150-200 ათასი შეიტანა, დანარჩენის წარმოება კი შენიანის ქარხანაში მოხდა. რაც შეეხება Audi-ს, მათ გასულ წელს 701 289 ავტომობილი გაყიდეს ჩინეთში, რომელთა უმეტესობა ადგილზე აწარმოეს.

სააგენტოს ცნობით, სარკინიგზო გადაზიდვები ავტომწარმოებლებს უფრო ძვირი უჯდებათ, თუმცა ის უფრო მოკლე დროს საჭიროებს და მეტად ეკოლოგიურია. ასე რომ ექსპორტის ეს გზა პრემიუმ ავტომწარმოებლებს უღირდათ მეტი მოქნილობიდან გამომდინარე. ასე მაგალითად, Porsche გასული წლის ბოლოსთვის ყოველ კვირა ორ-სამ მატარებელს აგზავნიდა ჩინეთში, თითოეულში კი 80 ავტომობილი იყო. გეგმავს თუ არა ეს კომპანია უარს რკინიგზაზე ზღვის სასარგებლოდ ამ ეტაპზე უცნობია.

წყარო: "ბიზნესპრესნიუსი"