„თუკი 24 დეკემბრიდან 3 იანვრის ჩათვლით თითქმის ყველაფერი იხსნება, და ჩვეულებრივად შეძლებენ მუშაობას. ნამდვილად იმსახურებენ რესტორნებიც ამ პირობის გაზიარებას“, - ამის შესახებ „კომერსანტს“ ერთ-ერთი ცნობილი ბრენდის „G.G Group“-ის რესტორნების „MARANI HALL“ მცხეთისა და „MARANI RESTAURANT & BAR“- ის დირექტორმა მალხაზ ნუცუბიძემ განუცხადა. ბიზნესმენი აცხადებს, რომ 10 სამუშაო დღე სტუმარ-მასპინძლობის სექტორს ამოსუნთქვის საშულებას მისცემს, წინააღმდეგ შემთხვევაში მალხაზ ნუცუბიძის თქმით, შეღუდევბს ბიზნესი ვერ გადაიტანს.
„პირველი კარანტინის დროს ასე არ გაგვჭირვებია. ახლა ბევრად გართულდა გადარჩენისთვის ბრძოლა. ზამთარი ამ ყველაფერს კიდევ სხვანაირად ამძიმებს, იმედიც აღარაა. 140 ადამიანი ერთმანეთს შევყურებთ თვალებში,რომ ეს ამდენხნიანი თანაგუნდელობა არ დაგვეშალოს. ახლა უკვე ძალიან გვიჭირს. თბილისის მარანი-დან და მცხეთის მარანი ჰოლი-დან ყოველთვიურად შემოსავლების სამსახურში, დაახლოებით 25-30 ათას ლარს ვრიცხავთ( თუ გადავაცილებთ დროს, ჯარიმა ან ყადაღა გარდაუვალია, შეღავათი არ არსებობს, არც გამონაკლისი). აბსოლუტურად კარგად გვესმის განგაშის და საგანგებო მდგომარეობის აუცილებლობა,მაგრამ ამ შექმნილი სიტუაციის გამო დაწესებული ასეთი რეგულაციები, უბრალოდ ნაჩქარევია ან ხელმეორედაა გადასახედი. ხუთშაბათს გამოაცხადეს, რომ შაბათს ვიკეტებოდით, ბიზნესმა შეიძლება ეს გადაწყვეტილება ვერ გადაიტანოს“, - აცხადებს მალხაზ ნუცუბიძის.
საქართველოს მთავრობას თხოვნით მიმართავს გაითვალისწინონ რესტორნის თანამშრომელთა და, მათ უკან მყოფი ადამიანების ყოფაც. მისი თქმით, მაშინ როცა თითქმის ყველა ბიზნესი იხსნება ყველა ეპიდემიოლოგიური წესების დაცვით რესტორნებიც უნდა გაიხსნას.
„ეპიდემიის გავრცელების საფრთხე რომ იყოს, ამაზე არც ვიფიქრებდით, მაგრამ ოჯახების გადარჩენის საფრთხეა და, მათ გადასარჩენად ამ რამდენიმე დღიან გახსნაში, იქნებ როგორმე რესტორნებიც შეიყვანოთ- რა თქმა უნდა, ყველა წესების დაცვით და ნებისმიერ დროს შემოწმებით. შეიქმნას მანამდე კომისია, მობრძანდნენ შეამოწმონ, ისევ გადათვალონ რამდენ კაცზე იქნება შესაძლებელი, ყველა წესის დაცვით სტუმრის მიღება და ჩვენც მოგვცენ საშუალება თვითგადარჩენის. დიდი პასუხისმგებლობაა დღეს სამსახური ადგილის შენარჩუნება და თანამშრომელისთვის ხელფასის გაცემაა. მთელი წელი ყველამ სტრესში გავატარეთ და ამ შობა- ახალ წელს, რომელიც გამორჩეული დღესასწაულია ადამიანისთვის, როგორმე ჩვენც შეგვახვედრონ დაუშლელად, სამსახურ შენარჩუნებულად და გადარჩენის იმედით. თუ ცეკვით ვირუსის გავრცელების ეშინიათ, დაგვიჯერეთ, უკვე ადამიანებს აღარ ეცეკვებათ, მხოლოდ ინერციით მოდიან, სხედან და არაფრისმეტყველი თვალებით ძლივს იღებიან“, — განმარტავს მალხაზ ნუცუბიძე.
„G.G Group“-ის რესტორნების დირექტორი კომუნალური გადასახადების გადახდის დაპაუზებას ითხოვს. მისი თქმით, გადაწყვეტილება ბიზნესისთვს მნიშვნელოვანი შეღავათი იქნება.
„განა არ ვიხდით, უბრალოდ,ცოტა ხნით შეგვიჩერეთ, რადგან ბალანსზე არსებული დეპოზიტის გამოყენების საშუალება არ გვეძლევა. დიახ, შუქის, გაზის და წყლის გადასახდზე თანხა გვიდევს დეპოზიტზე უბრალოდ ვერ ვიყენებთ, რადგან ამის ათვისება რომ მოხდესო, ჯერ უნდა გაუქმდეს დადებული ხელშეკრულება მეიჯარესთან, მერე თავიდან ახლებურად უნდა გაფორმდეს, მხოლოდ ამის შემდეგ შევძლებთ გადახდას. ამ ყველაფერს ისიც ამძაფრებს, რომ გვირეკავენ შესაბამისი სამსახურებიდან და მუდმივად გვახსენებენ გადაუხდელობის შემთხვევაში გაგითიშავთო. მარტივი რომ იყოს, ასე არ გავირთულებდით, მაგრამ მაცივარში არსებული პროდუქტის გაფუჭება და, დამატებითი ზარალს მართლა ვეღარ გაუძლებთ“, ამბობს მალხაზ ნუცუბიძე.
ბაჩო ადამია