დამწვრობის ცენტრის დირექტორი, გუგა ქაშიბაძე ამბობს მოსახლეობას პიროტექნიკისგან თავის შეკავებას ურჩევს.  როგორც მან ტელეეთერში განაცხადა გასულ წელს, ახალი წლის დღესასწაულის პერიოდში  მის სამედიცინო დაწესებულებაში 300 პაციენტი მიიღეს და 25 ზე მეტი ოპერაცია ჩატარდა.

„გასულ წელს 300 პაციენტი მივიღეთ, მათგან 25 სტაციონარული მკურნალობა დაჭირდა, დაახლოებით ამდენს დაჭირდა ოპერაციაც. მაგრამ ეს არ არის სრული სურათი, ძალიან ხშირია თვალის დაზიანება, ამპუტირებული კიდურები და ასე შემდეგ. ამ პერიოდში ნებისმიერი ქირურგიული განყოფილება განსაკუთრებულ რეჟიმში მუშაობს. დაახლოებით 47%-ში ზიანდება მარჯვენა მტევანი და  წინამხარი, 17%-ში სახე და თვალები, შემდეგ მოდის მუცლის ნაწილი და ქვემო კიდურები, მარცხენა ზედა კიდური და ასე შემდეგ,“- განაცხადა გუგა ქაშიბაძემ.

მედიკოსის თქმით, დღესასწაულებზე სროლა არ წარმოადგენს ისეთ ტრადიციას, რომლის შენარჩუნებაც აუცილებელია.

„საქართველოში გინდა არ გინდა ხმაურის და გასროლის ტრადიციაა, კალანდობა, ძეობა, მაგრამ ეს არ არის ტრადიცია, რომელსაც უნდა გავყვეთ. ძალიან ბევრ ქვეყანაშია პიროტექნიკა აკრძალული,“- აღნიშნა ქაშიბაძემ.

დამწვრობის ცენტრის ხელმძღვანელის თქმით, პიროტექნიკა არ წარმოადგენს სათამაშოს და რიგ შემთხვევაში ის ცეცხლსასროლი იარაღის მსგავსად სახიფათოა.

„ერთ რამეზე უნდა შევთანხმდეთ, ეს არ არის სათამაშო, ეს არ არის გასართობი, შეიძლება შეფუთვა სათამაშოს ჰგავდეს. გინდა ეს მოგხვედრია ახლო დისტანციიდან და გინდა იარაღი უსვრია ვინმეს. ყველაზე პატარამაც კი , „ბომბოჩკებს“ რომ უძახიან, შეიძლება ბავშვის თითების ამპუტირება გამოიწვიოს.  ნებისმიერ დღესასწაულს თან ახლავს ტრავმიანობის მომატება, გარკვეული ეიფორიაა, ყურადღება მოდუნებულია, ადამიანებიც ნასვამები არიან. გარდა ადამიანებისა ასეთი ხმაური  სტრესულია ცხოველებისა და ფრინველებისთვისაც.

ახალი წლის დღეებში დაზიანებული პაციენტების 60% ბავშვია. მიზეზი სხვადასხვაა ზოგჯერ არასწორად გამოიყენეს, ზოგჯერ ინსტრუქციას მიჰყვნენ, მაგრამ თვითონ პიროტექნიკა იყო დაზიანებული,“- განაცხადა გუგა ქაშიბაძემ.