რადიო “კომერსანტის“ ეთერში, გიორგი აბაშიშვილის საავტორო გადაცემაში “ბიზნესინსაიდერი“ ISET-ის კვლევითი ინსტიტუტის წამყვანმა ეკონომისტმა გიორგი პაპავამ ევროკავშირის კანდიდატი ქვეყნის სტატუსის თვითშეფასების კითხვარის კომენტირებისას ანტიკორუფციული სტრატეგიის ნაწილი შეაფასა და აღნიშნა, რომ კერძო სექტორსა და სახელმწიფოს შორის კომუნიკაციის მეტი შესაძლებლობაა. კითხვაზე, თუ რამდენად აქვს საქართველოს ანტიკორუფციული სტრატეგიის მიმართულებით მყარი პოზიცია, გიორგი პაპავა პასუხობს, რომ ქვეყანაში კორუფციაა გაზრდილი თუ რეგულაციური წნეხია, ამაზე პასუხის გაცემა რთულია.
„ხანდახან გაისმის ხოლმე კერძო სექტორის წარმომადგენლებისგან, რომ სახელმწიფოს წარმომადგენლებთან ხშირად კავშირების წარმოება ჭირს, თუმცა ეს არის ყურმოკრული ინფორმაცია და არ მინდა დადასტურებულ ფაქტად წარმოვაჩინო. თუმცა ის ფაქტი, რომ მაგალითად ქვეყანაში შემცირებულია ინვესტიციის დონე, გარკვეულწილად იმასაც უნდა უკავშირდებოდეს, რომ რიგი პროექტების განხორციელება გართულდა.
ეს რეგულაციური წნეხის გამო ხდება თუ გაზრდილი კორუფციის გამო, ამაზე მე რაიმე დასკვნის გაკეთება გამიჭირდება.
ერთი მაგალითი, კარგი გაგებით, არის სახელმწიფო შესყიდვების სისტემა, რომელიც საქართველოში გარკვეული პერიოდი ყველაზე გამორჩეული, გამჭვირვალობაზე ორიენტირებული, მიკერძოებულობის გამომრიცხავი იყო, ჩემი აზრით უკვე მოგვიძველდა და ერთ-ერთი რეფორმა, რომელსაც ახლა სახელმწიფო ახორციელებს, არის ამ მიმართულებით, რომ უფრო გამჭვირვალე და მეტად კონკურენტული გარემო შეიქმნას და პირდაპირი შესყიდვების შემთხვევები, იგივე რაღაც კონკრეტულ შემთხვევებში პირობების მორგება მინიმუმამდე იყოს დაყვანილი.
ის პრეტენზიები, რაც მესმის კერძო სექტორისგან, რიგ შემთხვევებში არ არის დადასტურებული და გავს თავიანთი არაკონკურენუნარიანობის შეფუთვის მცდელობებს, ამიტომ კერძო სექტორის მხარეც არ მინდა ღიად დავიჭირო, თუმცა არსებობს კომუნიკაციების მეტი შესაძლებლობები“, - აღნიშნა გიორგი პაპავამ.
თაკო კვაჭანტირაძე