სამინისტროში გამართულ შეხვედრაზე, დელეგაციის წარმომადგენლებმა საქართველოში ვიზიტის შედეგები შეაჯამეს და მელიორაციის მიმართულებით ორ ქვეყანას შორის სამომავლო თანამშრომლობის საკითხებზე იმსჯელეს.
აღსანიშნავია, რომ ერთკვირიანი ვიზიტის ფარგლებში, თურქეთის საირიგაციო კომპანიის წარმომადგენლებმა ქვემო სამგორის სარწყავი სისტემა, პალდოს სათავე ნაგებობა, სიონისა და თბილისის წყალსაცავების ჰიდროტექნიკური ნაგებობები დაათვალიერეს და სერვისცენტრების მუშაობის სპეციფიკას გაეცნენ.
თურქმა სპეციალისტებმა ქართველ კოლეგებს წყალმომხმარებელთა ორგანიზაციების ჩამოყალიბებასა და სატარიფო პოლიტიკასთან დაკავშირებით საკუთარი გამოცდილება გაუზიარეს. საუბარი შეეხო წყალგანაწილების ლიმიტების დადგენის მეთოდოლოგიას და ჰიდრომეტრიას, საირიგაციო ინფრასტრუქტურის ექსპლუატაციისა და მოვლა-შენახვის საკითხებს.
მინისტრის პირველმა მოადგილემ, გიორგი ხანიშვილმა შეხვედრაზე აღნიშნა, რომ შპს „საქართველოს მელიორაციის“ ინსტიტუციონალური განვითარება და შესაბამისი საკანონმდებლო ბაზის მომზადება პრიორიტეტული მიმართულებაა; შესაბამისად, თურქული მხარის გამოცდილების გაზიარება მნიშვნელოვანი იქნება დარგში არსებული გამოწვევების დასაძლევად.
საქართველოს საირიგაციო სექტორში არსებული გამოწვევების გაანალიზების შემდეგ, თურქულმა მხარემ მზაობა გამოთქვა, რეკომენდაციები და წინადადებები მოამზადოს, ასევე, პრაქტიკული გამოცდილების ადგილზე გასაცნობად, ქართველი სპეციალისტები თურქეთში მიიწვიოს, შპს „საქართველოს მელიორაციის“ თანამშრომელთათვის გადამზადებისა და კვალიფიკაციის ამაღლების კურსები უზრუნველყოს და, საჭიროებისამებრ, საქართველოში კონკრეტული სპეციალიზაციის მქონე თურქი ინჟინრები მოავლინოს.
შეხვედრის ბოლოს, მხარეებმა მიწის რესურსების მართვის, ნიადაგის დაცვისა და მიწების კონსოლიდაციის კუთხით თანამშრომლობის გაღრმავების საკითხებიც განიხილეს.
გიორგი ხანიშვილი
