გლაზგოში კლიმატის ცვლილების შესახებ გაეროს 26-ე გლობალური კონფერენცია (COP26) დასრულდა. ამის შესახებ BBC წერს.

გამოცემის ინფორმაციით, კონფერენციის შემაჯამებელი შეთანხმება 24-საათიანი დაგვიანებით მიიღეს და ის მოსალოდნელზე უფრო რბილ ფორმულირებებს შეიცავს. კერძოდ, წიაღისეული საწვავის მეშვეობით მიღებულ ენერგიაზე „ეტაპობრივი უარის“ ნაცვლად დაფიქსირებულია სიტყვები „ეტაპობრივი შემცირება“.

Reuters-ის ცნობით, ფორმულირება ნახშირის მსხვილი მწარმოებელი და მომხმარებელი ქვეყნების ზეწოლის შედეგად შეცვალეს, როგორებიც არიან ინდოეთი და ჩინეთი. დასავლეთის ქვეყნები ცვლილებებით უკმაყოფილონი დარჩნენ. COP26-ის თავმჯდომარემ, ბრიტანეთის ენერგეტიკის მინისტრმა, ალოკ შარმამ, ცვლილებების გამო ბოდიში მოიხადა და აღნიშნა, რომ მათ გარეშე შემაჯამებელ დოკუმენტი შესაძლოა ვერც დაემტკიცებინათ.

გაეროს გენერალური მდივანი,ანტონიუ გუტერეში მიიჩნევს, რომ მიღწეული შეთანხმებები საკმარისი არ არის, ეკოაქტივისტმა გრეტა ტუნბერგმა კი შემაჯამებელი დოკუმენტი ასე შეაფასა: „ბლა-ბლა-ბლა“.

COP26-ის კონფერენცია გლაზგოში 31 ოქტომბერს გაიხსნა.სამიტზე სიტყვით საქართველოს პრემიერ-მინისტრი ირაკლი ღარიბაშვილიც გამოვიდა. სპეციალისტები ვარაუდობდნენ, რომ მასზე ლიდერები გლობალურ დათბობასთან ბრძოლაში საკუთარ თავზე უფრო მკაცრ ვალდებულებებს აიღებდნენ, ვიდრე პარიზის კლიმატური შეთანხმებით არის გათვალისწინებული.

imedinews.ge