გლობალურ ბაზარზე 24 აგვისტოს მონაცემებით 1 უნცია ( 31,1 გრამი) ოქროს ფასი 1750,80 დოლარია. Kitco.com- ის მოხსენებაში, ნათქვამია, რომ ინდექსი 2021 წლის ივლისის მაჩვენებელთან შედარებით თითქმის 20%-ით დაეცა. რაც 2020 წლის შემდეგ ყველაზე დაბალი მაჩვენებელია.

„კომერსანტმა“ ოქროს ბაზრის შეფასება ოქროს ექსპერტს ხათუნა გაჩეჩილაძეს სთხოვა, მის განმარტებით  გლობალურ ბაზარზე მაღალი ხარისხის ოქრო სინჯით 999 - ერთი გრამი 158,85 ლარია, 1 გრამი არგენტუმი ანუ ვერცხლი 1,72 ლარია, პლატინა 80,007 ლარი,ხოლო რაც  შეეხება როდიუმს, რომელიც საიუველირო საქმეში ვერცხლის ან სხვა ნაკეთობის,  ბიჟუტერიის მოსაპირკეთებლად გამოიყენება, მისი ღირებულება 1 უნციაზე 12 500 ლარს შეადგენს.

 რაც შეეხება საქართველოს ბაზარს, მსოფლიო ტრენდისგან განსხვავებული ფასებია ოქროს ბირჟაზე.

„ოქროს შეფასებისას მნიშვნელობა აქვს ნაკეთობასაც, მაგალითად, რომ  იყიდო რუსული ნაკეთობა, კარგი ნივთი, იქ ოქროს შემცველობა მაღალია და გრამი 115 ლარი ღირს, რაც შეეხება შერეულ ნაკეთობას მისი ღირებულება 1 გრამზე დაახლოებით  93 ლარი გამოდის.

ზოდები, რომელიც შეიძლება იყოს 100 გრამიანი ან 20 გრამიანი, თავისი ნომრით, ე.წ. დამღით და ა.შ. 1 გრამის ღირებულება 230 ლარი ღირს, თუმცა პრიმიტიული წესით დამზადებული ოქროს ზოდი, რომ იყიდო მისი ფასი გრამზე 193 ლარია.

რაც  შეეხება შედარებით დაბალი ხარისხის ოქროს სინჯით 375, მისი ფასი ერთ გრამზე 39,50 ლარია. ხოლო სინჯით 750 – 119,55 ლარი. ასე მერყეობს ოქროს ფასი დღეს ბირჟაზე.

„ეკონომიკური მდგომარეობიდან გამომდინარე, დღეის მდგომარეობით ტენდენცია ცოტა დაბალია, თუმცა ვფიქრობ რომ ახლო მომავალში ფასი გაიზრდება. მაგალითად იყო პერიოდი როდესაც  ოქრო ძალიან იაფი ღირდა, მაგალითად 2005 წელს საქართველოში ერთი გრამი ბაჯაღლო ოქრო 14 ლარადაც იყიდებოდა“ - აღნიშნა ხათუნა გაჩეჩილაძემ.