ბრაზილიაში ყავის მარაგი იწურება და მსოფლიო ყავის დეფიციტი შორს არ არის, - ამის შესახებ ინფორმაციას Bloomberg-ზე  დაყრდნობით გამოცემა industryleadersmagazine ავრცელებს.

სტატიაში ნათქვამია, რომ ბრაზილიის მარაგი შესაძლოა შვიდ მილიონ ტომრამდე შემცირდეს, მაშინ როდესაც კომფორტული რაოდენობისთვის 12 მილიონი  60 კილოგრამიანი ტომარაა საჭირო. 

გლობალურად ყავაზე მოთხოვნა იზრდება, თუმცა ყავის მარცვლეულის დეფიციტი გარდაუვალია. კვლევითი კომპანია hEDGEpoint Global markets-ის კვლევის თანახმად, გასულ წელს გლობალურ ბაზარზე ყავაზე მოთხოვნა 2%-ით , ხოლო ამ სეზონზე 1.5% - ით არის გაზრდილი. არაბიკას ყავის მარცვლები მსოფლიო ყავის წარმოების თითქმის 75%-ს შეადგენს. 

„კომერსანტი“ დაინტერესდა, რა ხდება საქართველოში ყავის ბაზარზე, როგორია მოთხოვნა და ხომ არ გამოიწვია მსოფლიოში დეფიციტის  საფრთხემ ყავაზე ფასის მატება და საქართველოში ყავის კაფსულების მწარმოებელ კომპანია “მეამას“ დაუკავშირდა.

როგორც კომპანიაში გვითხრეს “მეამას“ ყავის მწვანე მარცვალი 18 ქვეყნიდან შემოაქვს. ესენია:  ბრაზილია, კოლუმბია, კუბა, ეკვადორი, გვატემალა, მექსიკა, ეთიოპია, კენია და სხვა.  კომპანიაში ადასტურებენ, რომ კლიმატური პირობებიდან გამომდინარე რიგ ქვეყნებში ყავის მოსავლის რაოდენობა ნამდვილად შემცირდა, რამაც მსოფლიოს მასშტაბით პროდუქციაზე ფასის ზრდა გამოიწვია. კომპანიაში „კომერსანტს“ ასევე უთხრეს, რომ ზოგადად ყავაზე ფასის ზრდა განპირობებულია არა მხოლოდ დეფიციტის არამედ ლოგისტიკური ხარჯების ზრდითაც, თუმცა “მეამა“ არსებული ფასის შენარჩუნებას ამ ეტაპზე მაინც ახერხებს.

„მწვანე მარცვალი  მეამას მაღალტექნოლოგიურ საწარმოში იხალება, იფქვება და კომპანიის ყავის ტექნოლოგების მიერ შემუშავებული რეცეპტების მიხედვით, იქმნება სხვადასხვა სახეობის კაფსულის ყავა.

ექსტრემალური კლიმატური პირობებიდან გამომდინარე რიგ ქვეყნებში ნამდვილად შემცირდა ყავის მოსავლის რაოდენობა, რამაც გამოიწვია პროდუქციაზე ფასის ზრდა, ასევე ფასის ზრდის მნიშვნელოვანი ფაქტორია მომატებული ლოჯისტიკური ხარჯებიც.

მიუხედავად მსოფლიოში ყავის მარცვალზე ფასის ზრდის ტენდენციებისა, კომპანია საოპერაციო ხარჯების ოპტიმიზაციით, ცდილობს არსებული ფასი შეინარჩუნოს და არ გააძვიროს პროდუქცია“. - აცხადებენ კომპანიაში.

რაც შეეხება  საქართველოში ყავაზე მოთხოვნას,  კომპანია „მეამას“ წარმომადგენელი „კომერსანტთან“ ამბობს, რომ “მეამას“ პროდუქციაზე მიმდინარე წელს და განსაკუთრებით ბოლო თვეებში მოთხოვნა საკმაოდ გაზრდილია.

„მოთხოვნა გაზრდილია როგორც საცალო გაყიდვების, ასევე B2B მიმართულებით და  ჰორეკა სექტორში. ჩვენ ვცდილობთ მაქსიმალურად მოვერგოთ ჩვენი მომხმარებლების ინტერესებს და საინტერესო ბიზნეს გადაწყვეტილებები შევთავაზოთ სხვადასხვა სექტორს“, - აცხადებენ კომპანიაში. 

თაკო კვაჭანტირაძე