საერთაშორისო ბაზრებზე საკვები პროდუქტების გაძვირებას პროგნოზირებენ. მსოფლიო ბაზრების ანალიტიკოსების ინფორმაციით, ამის მიზეზი ხორბლის მაღალი ფასია, რაც გავლენას სხვა კატეგორიის საკვებ პროდუქტებზეც მოახდენს. ამის შესახებ Bloomberg წერს.
კერძოდ, ჩიკაგოს საფონდო ბირჟაზე, 2012 წლის დეკემბრის შემდეგ პირველად, ბუშელი ხორბლის საბაზრო ღირებულებამ 8 დოლარს გადააჭარბა.
ექსპერტები ხორბლის ფასის მატებას ამინდის არახელსაყრელ პირობებსა და სასუქის ფასების ზრდას უკავშირებენ.
ჩიკაგოს საფონდო ბირჟაზე ვაჭრობის შედეგად ხორბლის მარტის ფიუჩერსის ფასები ბუშელზე 8,08 დოლარამდე გაიზარდა.
გამოცემა Bloomberg აღნიშნავს, რომ ხორბლის ფასი ზედიზედ მეექვსე თვეა იზრდება, ხოლო მხოლოდ ოქტომბერში ის 6,5%-ით გაიზარდა.
სააგენტო ასევე მიიჩნევს, რომ ხორბალზე ფასების ზრდამ შეიძლება გამოიწვიოს სხვა საკვები პროდუქტების ფასების მატებაც მთელ მსოფლიოში.
აღსანიშნავია, რომ მსოფლიო ბაზარზე სურსათის ფასების ინდექსი გასული პერიოდის განმავლობაში იზრდებოდა. 2021 წლის სექტემბერში, აგვისტოსთან შედარებით, 1.2%-ით გაიზარდა და 130 პუნქტს აღწევს, რაც 10 წლის განმავლობაში ყველაზე მაღალი მაჩვენებელია.
გაერო-ს სურსათისა და სოფლის მეურნეობის ორგანიზაციის (FAO) მონაცემებით, ეს ძირითადად განპირობებულია მცენარეული ზეთების, მარცვლეულის და შაქრის ფასების ზრდით.
ფასების ზრდის მოლოდინი აქვთ ქართველ იმპორტიორებსაც. როგორც დისტრიბუტორთა ასოციაციის ხელმძღვანელი ივა ჭყონია ,,კომერსანტთან“ აღნიშნავს, გლობალურ ბაზრებზე მიმდინარე პროცესი გადამდები აღმოჩნდება ადგილობრივი ბაზრისთვისაც, რასაც განაპირობებს როგორც ლარის მაღალი კურსი, ასევე რეგიონში მიმდინარე პროცესებიც, მათ შორის, თურქული ლირის გაუფასურება.
,,ფასები მსოფლიოში ყველაფერზე იზრდება. 2 მთავარი ფაქტორი, რაც საქართველოში პროდუქტის ფასზე აისახება, გლობალური ფასი და ლარის კურსია. შესაბამისად, ვიღებთ იმ მოცემულობას, როგორიც დღეს სამომხმარებლო ბაზარზეა. ველოდებით, რომ ფასები მოიმატებს, მაგრამ რა მაჩვენებლით და კონკრეტულად რა პერიოდიდან, ამაზე ჯერჯერობით ვერ ვისაუბრებთ. ფასები მიბმულია ეროვნული ვალუტის კურსზე. ბოლო 2 წლის განმავლობაში მხოლოდ აღმავალი ტრენდია ფასებში. ჩვენ ვითვალისწინებთ ასევე საწვავის ფასსაც, რაც ასევე მაღალი მაჩვენებლითაა გაძვირებული, ხოლო ლოგისტიკა პირდაპირ დისტრიბუციაზეა მიბმული. გასათვალისწინებელია რეგიონის ფაქტორიც, თურქული ლირა უფასურდება, ეს ტენდენცია თუ დიდხანს გაგრძელდება და იქ დაიწყება ფასების შემცირების პროცესი, ამას ქართული ბაზარიც იგრძნობს. ძალიან ფრთხილად უნდა ვიყოთ, რათა დავიცვათ ეროვნული ვალუტა და ლარიც არ მიყვეს ლირას, ეს არის ჩვენი მთავარი ამოცანა“, - აცხადებს ივა ჭყონია.
ცნობისთვის, ეროვნული ბანკის მიერ გამოქვეყნებული მონეტარული პოლიტიკის ანგარიშის თანახმად, 2021 წლის დასაწყისიდან მკვეთრად გაიზარდა სამომხმარებლო ფასების ინდექსი როგორც განვითარებულ, ასევე მზარდ და განვითარებად ქვეყნებში. აღნიშნული ძირითადად განპირობებულია პანდემიის პირობებში მიწოდების მხარეს წარმოქმნილი შეფერხებებით, ასევე, საერთაშორისო სასაქონლო ბაზრებზე პროდუქციის ფასების მზარდი დინამიკით.
საქართველოში საკვები პროდუქტების ფასების ინდექსი სექტემბერში 32.8%-ით გაიზარდა წინა წლის ანალოგიურ პერიოდთან შედარებით.
ამასთან, ნავთობის ფასი კი თითქმის გაორმაგებულია.
მარი ჩიტაია