ლარმა ბოლო პერიოდის გაუფასურების ახალი რეკორდი დაამყარა და 10 მარტს ეროვნული ვალუტის ოფიციალური კურსი დოლართან მიმართებით 3.4019 გახდა,  მაშინ როდესაც წლის დასაწყისში 3.0892-ს არ აღემატებოდა. თუმცა დღევანდელი ოფიციალური კურსით ლარი მცირედით გამყარდა და დოლართან მიმართებით 3.3189 გახდა. ლარის გაუფასურებას რუსეთ-უკრაინის ომის ფონზე ნეგატიურ მოლოდინებსა და ქვეყანაში არსებულ დაძაბულ პოლიტიკურ მდგომარეობას უკავშირებენ მთავრობის ეკონომიკურ გუნდში. რაც შეეხება ინფლაციას, 2022 წლის თებერვალში წლიური ინფლაციის დონემ 13.7 პროცენტი შეადგინა.

საქართველოს ეროვნულ ბანკში კი აცხადებენ, რომ მცურავ გაცვლით კურსს აქვს თვისება, როდესაც რაიმე მოლოდინები არსებობს, ის მაშინვე იწყებს მუშაობას და ისახება კურსში. რისკები, რაც ახლა არის შეფასებული, ამ ეტაპზე უკვე ასახულია გაცვლით კურსში. რაც შეეხება ინფლაციას, როგორც „კომერსანტს“ სებ-ში განუცხადეს, მიმდინარე მოვლენების შედეგად, თავისთავად, მსოფლიო ეკონომიკას რუსეთის ბაზრის ჩანაცვლება მოუწევს და მოკლევადიან პერიოდში, წარმოების ჯაჭვების გადაწყობა წარმოების ხარჯებს გააძვირებს.

„წლის დასაწყისში 2022 წლის გლობალური ეკონომიკის მთავარ გამოწვევად მაღალი ინფლაციის შემცირება მიიჩნეოდა. უკრაინაში მიმდინარე ომმა ეს პრობლემა კიდევ მეტად გაამწვავა. რუსეთის ეკონომიკას გლობალური წარმოების ჯაჭვში თავისი როლი და წვლილი აქვს, კერძოდ რუსეთი მსოფლიო ბაზარზე რიგი ნედლეულებისა და ენერგო რესურსის მიმწოდებელია. მიმდინარე მოვლენების შედეგად, თავისთავად, მსოფლიო ეკონომიკას რუსეთის ბაზრის ჩანაცვლება მოუწევს და მოკლევადიან პერიოდში, წარმოების ჯაჭვების გადაწყობა წარმოების ხარჯებს გააძვირებს. მაგალითად, უკვე სახეზეა ნავთობის ფასის მკვეთრი ზრდა. ამ ვითარებაში, გლობალურად ინფლაციური წნეხის გამწვავებას მოველით მოკლევადიან პერიოდში. თუმცა მსოფლიო ლიდერები ღიად აცხადებენ, რომ დღეს გვაქვს არაორდინალური ვითარება. გლობალურ ეკონომიკას მოკლევადიანად აუცილებლად ექნება დანაკლისი და ეს ყველა ქვეყნის ეკონომიკასა და, შესაბამისად, მათ მოსახლეობაზეც აისახება. თუმცა, კიდევ ერთხელ უნდა აღვნიშნოთ, და, დარწმუნებული ვართ, საქართველოს საზოგადოებასაც, მათ შორის, ბიზნესსაც კარგად აქვს გაცნობიერებული, რომ მოკლევადიან პერიოდში მსგავსი რყევები არის ის ფასი, რომლის გაღების პასუხისმგებლობა იტვირთა მსოფლიოს ჯანსაღმა ნაწილმა იმისათვის, რომ დემოკრატიულ, ჯანსაღ, თავისუფალ, ღირებულებებზე დაფუძნებულ სამყაროში გაგრძელდეს ცხოვრება, მათ შორის საქართველოში.

ეროვნული ბანკი თავის წვლილს შეიტანს ამ დამატებით ინფლაციური წნეხის შერბილებაში, რისი მთავარი ბერკეტიც ადეკვატური მონეტარული პოლიტიკაა, რასაც აქამდეც მივდევდით და, მომავალშიც გავაგრძელებთ“, — აცხადებენ ეროვნულ ბანკში.

საქართველოს ეროვნულმა ბანკმა 2022 წელს მხოლოდ ერთი სავალუტო ინტერვენცია განახორციელა. 9 მარტს გამართულ საქართველოს ეროვნული ბანკის სავალუტო აუქციონზე სებ-ის მიერ გასაყიდად გამოტანილი იქნა 50 მლნ. აშშ დოლარი, აუქციონზე კი 39 570 000 აშშ დოლარი გაიყიდა. საშუალო შეწონილმა გაცვლითმა კურსმა 3.3947 შეადგინა.

2021 წელს კი სებ-მა 9 ინტერვენციით 332.9 მილიონი დოლარი გაყიდა. ეროვნული ბანკის მონაცემებით, 2022 წლის იანვრის მდგომარეობით საქართველოს სავალუტო რეზერვების მოცულობა 4,078,074,900 დოლარს შეადგენს.

ნინო თამაზაშვილი