Glovo-ს საქართველოში ახალი გენერალური მენეჯერი ჰყავს. ამ თანამდებობაზე უკრაინელი არტემ კოლოსიუკი დაინიშნა, რომელიც მანამდე კომპანიის უკრაინის წარმომადგენლობაში სხვადასხვა რეგიონებს ხელმძღვანელობდა. ამის შესახებ ინფორმაციას კომპანია Glovo ავრცელებს.

მიიღე ინფორმაცია უფრო სწრაფად „კომერსანტის“ Telegram-ზე.

„არტემ კოლოსიუკი 9 თვის განმავლობაში, უკრაინის სხვადასხვა რეგიონებში ხელმძღვანელობდა Glovo-ს ოპერირებას. ამ დროის განმავლობაში, მან მოახერხა რეგიონული გუნდების შექმნა და სტრუქტურირება. გარდა ამისა, მას აქვს FMCG-ში, კომერციის ხელმძღვანელისა და გენერალური მენეჯერის გამოცდილება. ამასთან, არტემის რეზიუმეში შეხვდებით სტარტაპებთან თანამშრომლობის შთამბეჭდავ გამოცდილებასაც. ჩვენ გვჯერა, რომ არტემ კოლოსიუკის გამოცდილების ეს მიქსი დაგვეხმარება, რომ გავაძლიეროთ საქართველოში ჩვენი წარმომადგენლობა და გავაფართოოთ ბაზარი“, - აცხადებენ Glovo-ში.

ახალი გენერალური მენეჯერი, არტემ კოლოსიუკი, 1–ლი აპრილიდან შეუდგა მუშაობას, თუმცა უკრაინაში მიმდინარე ომის ფონზე, ის ქვეყანაში მაშინ ჩამოვა, როგორც კი შეზღუდვები მოიხსნება და გადაადგილება შესაძლებელი გახდება. ის აღნიშნულ პოზიციას 18 თვის განმავლობაში დაიკავებს.

მსოფლიოს წამყვანი მრავალკატეგორიული მიწოდების პლატფორმა Glovo უკვე სამ წელზე მეტია საქართველოში ოპერირებს და განსაკუთრებული პოპულარობით სარგებლობს. ამ დროის განმავლობაში, აპლიკაცია ქვეყანაში ყოველ მესამე სრულწლოვანმა მოქალაქემ გადმოწერა და ჯამში, ერთ მილიონზე მეტჯერ დააინსტალირა საკუთარ ტელეფონში.

შეგახსენებთ, რომ Glovo-ს აპლიკაციით სარგებლობა საქართველოს 10 ქალაქში: თბილისში, რუსთავში, ქუთაისში, ბათუმში, ზუგდიდში, ფოთში, სენაკში, გორში, თელავსა და ბაკურიანში, 24 საათის განმავლობაშია შესაძლებელი.