24 საათზე მეტი გავიდა მას შემდეგ რაც საქარველოს მთავრობამ საგანგებო მდგომარეობის ფარგლებში ზომები მნიშვნელოვანად გაამკაცრა. ქვეყანაში საყოველთაო კარანტინი გამოცხადდა, შეზღუდვების რაოდენობა კი კიდევ უფრო გაფართოვდა.
კომერსანტი დაინტერესდა, როგორ აგრძელებენ მთავრობის მიერ ნებადართული სექტორები მუშაობას. რა პრობლემები შეუქმნა საყოველთაო კარანტინის გამოცხადებამ სამშენებლო სექტორს და ხომ არ გამოიწვევს საქართველოს მთავრობის მიერ მიღებული გადაწყვეტილება ქვეყანაში ინფრასტრუქტურული პროექტების გაჩერებას.
ქვეყანაში შექმნილი მდგომარეობის გამო მუშაობა გაურკვეველი დროით შეაჩერა დეველოპერული კომპანია „ჯი დი ჯი ჯგუფმა“. როგორც კომპანიის დამფუძნებელი დამფუძნებელი, ბეჟან წაქაძე აცხადებს „ჯი დი ჯი ჯგუფს“ 4 აქტიური მშენებლობა ჰქონდა, რომელთა კონსერვაცია ბიზნესმენმა გუშინ დაიწყო.
„დავემორჩილეთ კანონს, ყველაფერი გავაჩერე, რა თქმა უნდა გაურკვეველი ვადით. დავიბარე ისეთი ადამიანები რომელთა ყოფნაც აუცილებელი იყო მშენებლობის ლოკალიზებისთვის, რათა დაგვეკეტა კარები და მოგვეხდინა გარკვეული კონსერვაცია.დასავლეთშიც დავრეკე, რათა მშენებლობა იქაც შეაჩერონ და მოახდინონ ობიექტის კონსერვაცია. პროცესი დაახლოებით ორი დღე გაგრძელდება. ველოდები რა მოხდება ქვეყანაში და საერთოდ მსოფლიოში. სხვა გზა არ გვაქვს, ახლა ყველაფერი გაურკვეველია“, - განმარტავს ბეჟან წაქაძე.
ახალ პირობებზე გადაწყობას ცდილობს შპს „გზები და კეთილმოწყობა“. კომპანიის დირექტორი ბესიკ კასრაძე აცხადებს, რომ მუშაობა დროებით შეაჩერა, რათა გაერკვიოს რა შეზღუდვები დაუწესა სახელმწიფომ:
„ჯერჯერობით მუშაობა შეჩერებული მაქვს, ახლა ვლაგდებით თუ როგორ გავაგრძელოთ პროცესი. მეუბნებიან რა არის საჭირო კანონის დასაცავად და ვნახოთ როგორ დავლაგდებით. გადასაადგილებლად თუ მჭირდებოდა 2 ტრანსპორტი ახლა 5 მჭირდება. ღმერთი მოწყალეა, არ გავჩერდებით, მოვერგებით იმ რეალობას რომელიც ქვეყანაშია“, - განაცხადა ბესიკ კასრაძე.
მუშაობას ჩვეულებრივ რეჟიმში აგრძელებს უმსხვილესი სამშენებლო კომპანია „ანაგი“. ქვეყანაში შექმნილი რთული სიტუაციის მიუხედავად, კომპანიას არც ერთი მშენებლობა არ გაუჩერებია.
„აბსოლუტურად ყველა კანონს და რეკომენდაციას ვიცავთ. არანაირი პრობლემა არ შეგვქმნია. გადაადგილების თვალსაზრისით, დასაქმებულებს ჩვენივე მანქანებით ვემსახურებით და ჩვენვე გადაგვყავს, ბევრი საკუთარი ტრანსპორტით დადიოდა. 9 საათის შემდეგ ვინც გადაადგილდება იმათი სახელი და გვარები გადავეცით და საშვები დაგვიმზადდება“- განმარტავენ კომპანიაში.
საკითხზე საუბარი ჯერჯერობით უჭირს „მენაშენეთა ასოციაციის“ თავმჯდომარე ირაკლი როსტომაშვილდ. მისი თქმით, ახლა მთავრია საკოორდინაციო საბჭოს მიერ გაცემული რეკომენდაციები შესრულდეს. კომპანია „არსის“-ის ერთ-ერთი დამფუძნებელი „კომერსანტთან“ საუბარში ამბობს იმასაც რომ ახლა იყიდება ის ბინები, რომელიც მომხმარებლებმა კარანტინის გამოცხადებამდე შეარჩია, უახლოეს მომავალში კი სამშენებლო სექტორში გაყიდვები გარკვეული პერიოდით შეჩერდება.
„კონკრეტულ პრობლემებს, რომელიც კარანტინის გამოცხადებას მოჰყვება, რამდენიმე დღეში ვნახავთ. არის ბრიგადები, რომლებიც ობიექტზე თვითონ მოდიან, თუმცა არის კატეგორია რომელიც თბილისთან ახლოს ცხოვრობს და ისინი ალბათ ვეღარ ივლიან. სიტუაციის მიხედვით რაღაც კორექტირებებს მოვახდენთ. ახლა მთავარია შესრულდეს ის რაც ითქვა, პირველი არის ეს, მეორე არის მშენებლობა. იმ შემთხვევაში თუ ეს ორი ერთად შეთავსდება მუშაობას გავაგრძელებთ“, - განაცხადა ირაკლი როსტომაშვილმა.
ბაჩო ადამია