„გმირობის ნაყოფი“ ხილისა და ჩირის მრავალფეროვან პროდუქციას აერთიანებს. პროდუქციას საოკუპაციო ხაზთან მცხოვრები ფერმერები აწარმოებენ, რომლებსაც განსაკუთრებით სჭირდებათ როგორც მორალური, ასევე ფინანსური მხარდაჭერა.

კამპანიის დაწყების შემდეგ, ფერმერების შემოსავალი მნიშვნელოვნად გაიზარდა. მზარდი მოთხოვნის შესაბამისად მათი ბიზნესი გაფართოვდა და შეიქმნა ახალი სამუშაო ადგილები. კამპანიის ერთგული მხარდამჭერი USAID-ია.

„ბორდერიზაცია არ შეჩერებულა და ეს ყველაზე მეტად ე.წ. საოკუპაციო ხაზთან იგრძნობა. მავთულხლართებთან დამუშავებული ქართული მიწა და ამოქმედებული  წარმოება დიდი სტიმულია, რადგან იცი, რომ ქართულ საქმეს ემსახურები", - ამბობს  ეკატერინე ხოდელი, ფერმერი, რომლის მიერ წარმოებული ჩირის შეძენა, სხვა მწარმოებლების  პროდუქციასთან  ერთად შეგიძლიათ, თბილისში, გორში, გუდაურსა და კახეთის გზატკეცილზე არსებულ სუპერმარკეტებში კარფური, ზღაპარი და სმარტი.

ფერმერების მხარდაჭერის მიზნით, „გმირობის ნაყოფის" პროდუქცია წარმოდგენილი იყო თბილისის საშობაო და საახალწლო ბაზრობებზეც, მათ შორის USAID-ის სადღესასწაულო ბაზრობაზე, IWAG ზამთრის ბაზრობასა და Fabrika-ს საშობაო ბაზრობაზე.  გაყიდვების თვალსაზრისით გამოფენები საკმაოდ წარმატებული აღმოჩნდა და ფერმერების მოლოდინს მნიშვნელოვნად გადააჭარბა.