თელავი-თბილისის დამაკავშირებელ გომბორის უღელტეხილზე გვირაბის მშენებლობა რამდენჯერმე დაანონსდა, თუმცა, როგორც „კომერსანტს“ საავტომობილო გზების დეპარტამენტში განუცხადეს, ამჟამად შიდასახელმწიფოებრივი მნიშვნელობის ვაზიანი-გომბორი-თელავის კმ33-კმ59 მონაკვეთის სარეაბილიტაციო სამუშაოების საპროექტო დოკუმენტაციის მომზადების პროცესი მიმდინარეობს, რომლის ფარგლებშიც უღელტეხილზე გვირაბის მშენებლობა დაგეგმილი არ არის.
თელავიდან თბილისში საავტომობილო გზით მოხვედრა 2 მარშრუტითაა შესაძლებელი, გურჯაანზე გამავალით, რომელიც 150 კმ-ზე მეტია და გომბორზე გადასვლით, სადაც მანძილი 95 კმ-მდე მოკლდება. მანძილებს შორის სხვაობას ისიც ემატება, რომ გურჯაანიდან თელავამდე ვიწრო გზის უმეტესი ნაწილი სოფლებზე გადის, რის გამოც გადაადგილების დრო კიდევ უფრო იზრდება. თავის მხრივ, გომბორის მინუსი ხშირი მოსახვევებია, რის გამოც დიდი ავტობუსებისა და ტრაილერების მძღოლები ისევ გურჯაანზე გამავალ მარშრუტს ირჩევენ, კიდევ ერთი პრობლემა ზამთარში უხვი ნალექია, გომბორზე გვირაბის მშენებლობაც სწორედ ამ მიზეზით განიხილებოდა.
2017 წლის მაისში კახეთის გუბერნატორმა ირაკლი ქადაგიშვილმა განაცხადა, რომ უღელტეხილზე გვირაბის მშენებლობა განიხილებოდა. იმ პერიოდში, კვირიკაშვილის პრემიერობის დროს, მთავრობა ტურისტული მიზნებისთვის კახეთში რკინიგზის აღდგენისა და აეროპორტის გახსნის დაპირებასაც იძლეოდა. ძველი პროექტებიდან მხოლოდ ავტობანი შემორჩა, რომლის მშენებლობაც ჯერ არ დაწყებულა.
გომბორზე გვირაბის გაჭრის იდეა 2017 წელს არ გაჩენილა. 2012 წლის მარტში პრეზიდენტმა სააკაშვილმა განაცხადა, რომ გვირაბის მშენებლობა 2015 წელს დაიწყებოდა და 2017 წელს დასრულდებოდა. მისივე თქმით ისარივით სწორი გზის შედეგად თბილისიდან თელავამდე გადაადგილების დრო 40 წთ-მდე შემცირდებოდა.
თავად გომბორის გზაც წინა ხელისუფლების დროს, 2010 წლის ოქტომბერში მსოფლიო ბანკის ფინანსური მხარდაჭერით გაიხსნა. ძველი გზის რეაბილიტაცია 43 მლნ ლარი დაჯდა.
ამჟამად კახეთის მიმართულებით მსხვილი პროექტებიდან მხოლოდ თბილისი-ბაკურციხე-ლაგოდეხის გზის მშენებლობა იგეგმება. გზა ოთხზოლიანი იქნება და მასზე 650 მლნ ლარი დაიხარჯება.