არ მივცეთ სახელმწიფოს უფლებას ჯოხი გადატეხოს პილოტზე, რომელიც მართავდა ვერტმფრენს და პილოტებზე, რომლებიც დაფრინავენ პარაპლანით, - ასე გამოეხმაურა პარაგლაიდინგის ფედერაციის პილოტი მარიამ ბაბუნაშვილი შს მინისტრის განცხადებას, რომ „არაერთხელ მოხდა, თითქმის კვირა არ გავა, რომ არ მოხდეს სამაშველო ოპერაციის ჩატარება, ვერტმფრენის ჩართვა. რა თქმა უნდა, არის დაღუპვის ფაქტები“.

ბაბუნაშვილის აცხადებს, რომ შს მინისტრმა იცრუა და ასეთი ფაქტები ხშირად არ ხდება. 

„მინდა გამოვეხმაურო გომელაურის განცხადებას და ვთქვა, რომ არის სრული სიცრუე რაც თქვა, რომ ასეთი შემთხვევები ხდება ხშირად. მინდა აღვნიშნო, რომ პარაგლაიდინგი საკმაოდ სახიფათო სპორტია და ყველა მგზავრი, რომელიც გუდაურში დაფრინავს აწერს ხელს, რომ ის იაზარებს ამ რისკებს. თუმცა 100%-ით დაზღვეული არავინ არ არის და ასეთი შემთხვევები ხშირად არ ხდება. არ მივცეთ სახელმწიფოს უფლებას ჯოხი გადატეხოს პილოტზე, რომელიც მართავდა ვერტმფრენს და პილოტებზე, რომლებიც დაფრინავენ პარაპლანით. ამ ყველაფერში აქ ძალიან დიდი წვლილი მიუძღვის სახელმწიფოს, რადგანაც სახელმწიფოს არ ყავს არც ერთი სამაშველო ვერტმფრენი. ფაქტობრივად სასიკვდილოდ გამოუშვეს გმირი ადამიანები მი-8 ტიპის ვერტმფრენით", აცხადებს პარაგლაიდინგის ფედერაციის პილოტი „ტვ პირველთან“ ინტერვიუში.

მისივე განმარტებით, ასეთ ვითარებაში სამაშველო ოპერაციაში მი-8 ტიპის ვერტმფრენის ჩართვა არ შეიძლებოდა და იყო დიდი შეცდომა.

„ყველამ ვიცით, რომ პილოტი იყო საკმაოდ გამოცდილი, თუმცა როდესაც ვსაუბრობთ ვერტმფრენის შესაძლებლობებზე, ვინც ავიაციაში ვერკვევით ყველამ ვიცით, რომ მი-8 ტიპის ვერტმფრენი არ არის სამხედრო არამანევრული ვერტმფრენი, რომლის დაშვება ასეთ პატარა მანძილზე არაფრით არ შეიძლება. მი-8 ტიპის იქ დაშვება იყო ძალიან დიდი შეცდომა და ამას საკუთარი თვალით ვუყურებდი. ვხედავდი, რომ პილოტი საკმაოდ დიდი ხნის განმავლობაში ფიქრობდა მისულიყო თუ არა იქ. მათი ოჯახის წევრებს მინდა უთხრა, რომ მათი სახით ჰყავთ გმირები, რადგანაც იცოდნენ რა რისკზე მიდიოდნენ, იცოდნენ რომ ამ ვერტმფრენით იქ შესვლა შესაძლოა ფატალურად დასრულებულიყო და მაინც გარისკეს, საკუთარი სიცოცხლის ხარჯზე“, - აცხადებს ბაბუნაშვილი.

პარაგლაიდინგის ფედერაციის წარმომადგენელი აცხადებს, რომ დღეს სამთო კურორტები ტურისტებითაა სავსე, მაგრამ ქვეყანას არ აქვს არანაირი სამაშველო აღჭურვილობა, არ ყავს სამაშველო ვერტმფრენი.

“სამთო კურორტები არის მიგდებული“, - აცხადებს ბაბუნაშვილი.

მისი თქმით, დღეს ის მაშველები, რომლებიც ხევიდან პილოტის ამოყვანის სამაშველო სამუშაოებში იღებდნენ მონაწილეობას, იყვნენ საკუთარი ენთუზიაზმის ხარჯზე.

„შემთხვევა მოხდა დღის განმავლობაში და სახელმწიფომ საათების განმავლობაში ვერაფერი გააკეთა იმისათვის, რომ ამოეყვანა ეს ადამიანები. ბატონმა გომელაურმა გამოსავლის ძიების მაგივრად გადაწყვიტა, რომ პარაგლაიდინგი შეწყვიტოს საქართველოში. ჩვენ წლებია ვეხვეწებით სახელმწიფოს მოენიჭებიათ ლეგიტიმაცია და მოეცათ უფლება, რომ გაგვეკონტროლებინა ფრენები, იყო თუ არა ლიცენზირებული პილოტი, იყო თუ არა აღჭურვილობა შესაბამისი. დიდი ხანია სახელმწიფოსთან მივდივართ, მაგრამ რეაგირება არის ნული“, - განაცხადა პარაგლაიდინგის ფედერაციის პილოტმა.

საქართველოს შინაგან საქმეთა მინისტრის ვახტანგ გომელაურის განცხადებით, ვიდრე გუდაურში მომხდარ შემთხვევასთან დაკავშირებით ყველაფერს არ შეისწავლიან, პარაპლანით ფრენები აიკრძალება.

მისივე თქმით, პარაპლანით ფრენებზე რეგულაციები უნდა გამკაცრდეს ან საერთოდ აიკრძალოს.

„რაც შეეხება პარაპლანით ფრენებს, დიდი პრობლემაა ნამდვილად, გიდასტურებთ. არაერთხელ მოხდა, თითქმის კვირა არ გავა, რომ არ მოხდეს სამაშველო ოპერაციის ჩატარება, ვერტმფრენის ჩართვა. რა თქმა უნდა, არის დაღუპვის ფაქტები. ალბათ უნდა ვიმუშაოთ ამაზე, რეგულაციები გამკაცრდეს ან საერთოდ აიკრძალოს. არ ვიცი, აქ რატომ ხდება ხშირად ჩამოვარდნა პარაპლანების. ქარია, ხეობებია, ან არ არიან პროფესიონალები, ლიცენზიაც როგორ გაიცემა – ყველაფერი საინტერესოა და ამასაც ჩავყვებით აუცილებლად. ვიდრე ეს დამთავრდება, ჩემი აზრით, უნდა გაჩერდეს ყველანაირი პარაპლანებით ფრენა და შესწავლის შემდეგ, გაიცეს ლიცენზია ისეთ ადამიანებზე, ვინც ნამდვილად პროფესიონალია. ამ დღეების განმავლობაში, ვიდრე პასუხი არ გვეცოდინება, შეჩერდება ფრენა“, – განაცხადა ვახტანგ გომელაურმა.

შეგახსენებთ, რომ 29 ივლისს გუდაურში სასაზღვრო პოლიციის კუთვნილმა ვერტმფრენმა მართვა დაკარგა და ჩამოვარდა. ვერტმფრენით გუდაურში ჩამოვარდნილი პარაპლანისტების სამაშველო ღონისძიება მიმდინარეობდა.

შინაგან საქმეთა სამინისტროს ინფორმაციით, ვერტმფრენის ბორტზე რვა პირი იმყოფებოდა.