წმინდა სინოდის წევრმა, გორისა და ატენის მიტროპოლიტმა ანდრიამ (გვაზავა) კიევ-პეჩორის ლავრის გარშემო განვითარებულ მოვლენებთან დაკავშირებით უკრაინაში მოსკოვის საპატრიარქოს დაქვემდებარებაში მყოფი ეკლესიის მიტროპოლიტ ონოფრეს მხარდაჭერა გამოუცხადა. განცხადება რუსეთის საპატრიარქომ გამოაქვეყნა.

„ეპისკოპოსმა აღნიშნა, რომ საქართველოს ეკლესია ღრმა მწუხარებას გამოთქვამს უკრაინაში მომხდარი ტრაგიკული მოვლენების გამო და ხაზგასმით აღნიშნა: „ჩვენდა სამწუხაროდ, უკრაინის მართლმადიდებელი ეკლესიის მრავალმილიონიანი სამწყსოს მდგომარეობა უკრაინის მართლმადიდებლური ეკლესიის განსაცდელების სიმძიმით მძიმდება. ბევრი მორწმუნე ავლებს პარალელს ბოლშევიკურ დროს ეკლესიის დევნასთან“

მიტროპოლიტმა ანდრიამ ხაზგასმით აღნიშნა, რომ „უკრაინის მართლმადიდებელ ეკლესიაზე მიმდინარე ძალისმიერი ზემოქმედება მიუღებელია როგორც სულიერი, ასევე სამოქალაქო კანონების მიხედვით“.

ვლოცულობთ ღვთის წყალობისა და უსწრაფესი მშვიდობისთვის თქვენი ქრისტესმოყვარე სამშობლოსთვის , ეკლესიისა და ხალხის ერთიანობისთვის, უკრაინის მართლმადიდებელი ეკლესიის მრევლის სულისა და სხეულის განმტკიცებისთვის, მათ წინამძღვრებთან – უნეტარეს მიტროპოლიტ ონოფრესთან, სინოდის წევრებთან, თანამოძმეებთან და მორწმუნეებთან ერთად. - აღნიშნულია წერილში, რომელიც რუსეთის საპატრიარქოს მტკიცებით,  მიტროპოლიტმა ანდრია გვაზავამ გაავრცელა.

2023 წლის 23 თებერვლის მდგომარეობით, უკრაინის უშიშროების სამსახურმა გამოიძია თითქმის 60 სისხლის სამართლის საქმე მოსკოვის დაქვემდებარებაში მყოფი სასულიერო პირების წინააღმდეგ, 350-ზე მეტი ეკლესიის შენობა და 850 ადამიანი საფუძვლიანად შემოწმდა. სასამართლომ 7 გამამტყუნებელი განაჩენი გამოიტანა.

გასული წლის ბოლოს უკრაინის პრეზიდენტმა ვოლოდიმირ ზელენსკიმ ხელი მოაწერა განკარგულებას ეროვნული უსაფრთხოებისა და თავდაცვის საბჭოს გადაწყვეტილების შესრულების შესახებ, რომელიც, კერძოდ, რუსეთთან დაკავშირებული რელიგიური ორგანიზაციების საქმიანობის აკრძალვას ითვალისწინებს.

ნოემბერში უკრაინის უსაფრთხოების სამსახურმა და პოლიციამ მოსკოვის საპატრიარქოს დაქვემდებარებაში მყოფი უკრაინის მართლმადიდებელი ეკლესიის  არაერთ მონასტერში, მათ შორის კიევ-პეჩერის ლავრაში ჩაატარა „კონტრდაზვერვითი ღონისძიებები, რუსეთის სპეცსამსახურების ძირგამომთხრელი საქმიანობის გამოსავლენად და აღსაკვეთად.

უკრაინის მართლმადიდებელმა ეკლესიამ (УПЦ) მოსკოვის საპატრიარქოსგან დამოუკიდებლობა 2022 წლის მაისში გამოაცხადა. მიუხედავად ამისა, უკრაინის ხელისუფლების წარმომადგენლები მიიჩნევენ, რომ УПЦ რჩება რუსეთის პოლიტიკის გამტარებლად. УПЦ-ს უთანხმოება აქვს უკრაინის მეორე მართლმადიდებელ ეკლესიასთან (ПЦУ), რომლის ავტოკეფალია 2019 წელს აღიარა კონსტანტინოპოლის საპატრიარქომ.

25 მარტს კათოლიკოს-პატრიარქმა ილია მეორემ მსოფლიო პატრიარქ ბართლომეოს I-ს უკრაინაში რუსეთის ეკლესიის მხარდამჭერი წერილით მიმართა და სთხოვა, რომ ჩაერთოს იმ დაძაბულობის განმუხტვაში, რომელიც უკრაინაში რუსული ეკლესიისთვის კიევ-პეჩორის ლავრის ჩამორთმევის შემდეგ წარმოიქმნა.