2023 წლის 5 აპრილს საერთაშორისო აუდიტორული და ბიზნეს-საკონსულტაციო კომპანია გრანთ თორნთონსა და ააიპ საქართველოს ფინტექ ასოციაციას (FIA) შორის ურთიერთთანამშრომლობის მემორანდუმი გაფორმდა. მემორანდუმს ხელი მოაწერეს გრანთ თორნთონის ვიცე მმართველმა პარტნიორმა პაატა შურღაიამ და FIA -ს  სამეთვალყურეო საბჭოს თავმჯდომარემ დავით კიკვიძემ.

ურთიერთთანამშრომლობის ფარგლებში, მხარეები თანხმდებიან,   შეიმუშაონ მხარდაჭერისა და თანამშრომლობის მექანიზმები ორმხრივად სასარგებლო კლევებისა და პროექტების წარმოებისთვის. მხარეები გამოთქვამენ მზადყოფნას განახორციელონ კოორდინირებული აქტივობები ფინანსური ტექნოლოგიების (Fintech) სფეროში, კერძოდ: ერთობლივი პროექტები/კვლევები, დარგის განვითარების ხელშეწყობა კომპეტენციის ფარგლებში, ერთობლივი კონფერენციები, ლექციები და სხვა საგანმანათლებლო ღონისძიებები.

“ვფიქრობ ძალიან საინტერესო თანამშრომლობა გავაფორმეთ გრანთ თორნთონთან, რადგან ამ კომპანიას უაღრესად დიდი გამოცდილება გააჩნია საერთაშორისო მასშტაბით, შესაბამისად ამ გამოცდილების გაზიარება საქართველოს ფინტექ ეკოსისტემის განვითარებისთვის მნიშვნელოვანი წინაპირობა შეიძლება გახდეს, გრანთ თორნთონის დახმარებით ასოციაციის წევრ კომპანიებს სხვადასხვა სერვისებს შევთავაზებთ, რაც მათ ზრდაში და განვითარებაში დაეხმარება, გარდა ამისა ბევრ საინტერესო ღონისძიებას ვგეგმავთ, რასაც ეტაპობრივად შევთავაზებთ ფინტექ საზოგადოებას” - აღნიშნა დავით კიკვიძემ.

როგორც პაატა შურღაიამ აღნიშნა - “საქართველოს ფინტექს ასოციაცია“ განვითარების ეტაპზეა და ამ განვითარების ხელშესაწყობად მნიშვნელოვანია სხვადასხვა საერთაშორისო სტეიკჰოლდერების ჩართულობა და საერთაშორისო გამოცდილების გაზიარება. მემორანდუმის ფარგლებში, გრანთ თორნთონ საქართველო აპირებს გაუზიაროს ქსელის საერთაშორისო გამოცდილება, რასაც უზრუნველყოფენ ჩვენი კომპანიის ექსპერტები ბიზნეს პროცესების, საგადასახადო და იურიდიული მიმართულებებით.

გრანთ თორნთონის შესახებ

გრანთ თორნთონი მსოფლიოს ერთ-ერთი წამყვანი დამოუკიდებელი აუდიტორული და ბიზნეს საკონსულტაციო კომპანიების საერთაშორისო ქსელია. გრანთ თორნთონის წევრი ფირმები პროფესიონალური რჩევებით ეხმარებიან დინამიკურ ორგანიზაციებს საკუთარი სტრატეგიული ამბიციების განხორციელებაში. გრანთ თორნთონის გუნდის წევრები, პარტნიორთა ხელმძღვანელობით,  მაქსიმალურად იყენებენ საკუთარ ცოდნასა და გამოცდილებას იმისათვის, რომ კარგად გაიაზრონ საჯარო, თუ კერძო კომპანიების წინაშე მდგარი გამოწვევები და დაეხმარონ მათ პრობლემების გადაწყვეტაში. გრანთ თორნთონის 68,000 თანამშრომელი, 145 ქვეყანაში მუშაობს იმისათვის, რომ იყოს გამორჩეული კლიენტების, კოლეგებისა და საზოგადოებისათვის.   

ააიპ საქართველოს ფინტექ ასოციაციას (FIA)

საქართველოს ფინტექ ასოციაცია დაარსდა 2020 წელს და მისი მიზანია ხელი შეუწყოს ინფორმაციის გაცვლას და კავშირების დამყარებას ფინტექ კომპანიებს, კანონმდებლებსა და საზოგადოებას შორის. ფინტექ ასოციაციის პლატფორმის მეშვეობით ხდება ბაზრის მონაწილეებისა და დაინტერესებულ პირების ინტეგრაცია ფინტექ ეკოსისტემაში, რათა ასოციაციის წევრმა კომპანიებმა ერთმანეთს გაუზიარონ საკუთარი გამოცდილება, საუკეთესო პრაქტიკა და ინოვაციური მიდგომები, რაც საბოლოოდ ხელს უწყობს ფინტექ ინდუსტრიის მდგრად განვითარებას ღია და გამჭვირვალე გარემოში.

(R)