„აზარტული თამაშების კვლევისა და ლუდომანიის პრევენციის ცენტრის“ დამფუძნებელი გუგა ბესელია მიიჩნევს, რომ ონლაინ კაზინოების საკითხი გონივრულად უნდა დარეგულირდეს და მასში ფსიქოლოგებიც ჩაერთონ.

როგორც მან აღნიშნა, ლუდომანია ფსიქიკური ჯანმრთელობის პრობლემაა, რომელიც ყველა ასაკობრივ კატეგორიას ეხება.

„რაც შეეხება რეგულაციას, ვფიქრობთ, რომ ასაკობრივი ზღვარი გასათანაბრებელია. სათამაშო ბიზნესში გვაქვს 2 რეგულაცია ასაკთან დაკავშირებით, ონლაინის მიმართულებით 18 წელი, სახმელეთო ტიპის სამორინეების მიმართულებით 21 წელი. ეს გასათანაბრებელია, მაგრამ 25 წელი საიდან მოვიდა ჩემთვის გაუგებარია. ეს საბოლოოდ ძალიან დიდ პრობლემას შექმნის. რას ვუშვებით იმ ადამიანებს, რომლებსაც აქვთ დამოკიდებულება, ქცევითი აშლილობა ლუდომანიის სახით. 23, 24 წლის ადამიანებს რას ვუშვებით? რამე სარეაბილიტაციო პროგრამას ვთავაზობთ? არა, უბრალოდ, ვეუბნებით, რომ ითამაშონ. თუ ეს ადამიანები არ ითამაშებენ, მათ რეალურად 2 გზა აქვთ: ერთი არის იატაკქვეშეთი, რომელიც არის კრიმინალური გზა და საბოლოოდ, ბევრად უფრო კრიმინალურ გარემოს მივიღებთ საქართველოში და მეორე, გლობალური ბაზარი“,- განაცხადა მედიაჰოლდინგ „კვირის“ პრესკლუბში გამართულ პრესკონფერენციაზე ბესელიამ.

მისი განმარტებით, სათამაშო ბიზნესი გონივრულად უნდა დარეგულირდეს. როგორც გუგა ბესელია განმარტავს, ამ ეტაპზე გაურკვეველია, რა მექანიზმებით და როგორ აიკრძალება ინტერნეტში აზარტული თამაშების თაობაზე რეკლამა.

„ჩვენმა ორგანიზაციამ ჩაატარა კვლევა და ამ კვლევის შედეგებით მიხედვით, 14-დან 18 წლამდე მოზარდების ჯგუფის 48%-ს აქვს შემხებლობა აზარტულ თამაშებთან. რეალურად, კანონი არის, მაგრამ არ მუშაობს. თუ ეს კანონიც ასევე მივიღეთ და უბრალოდ, ასაკი 25 ეწერა 18 წლის ნაცვლად, მაშინ რა აზრი აქვს კანონში რა ეწერება?! მთავარი არის აღსრულების ნაწილი“,-განაცხადა ბესელიამ.

ცნობისთვის, პრემიერ-მინისტრ ირაკლი ღარიბაშვილის განცხადებით, პირველ ეტაპზე იგეგმება ონლაინ კაზინოებისთვის გადასახადის გაზრდა, რეკლამის აკრძალვა, მომხმარებლების ასაკობრივი ზღვარის 25 წლამდე აწევა, მეორე ეტაპზე კი, საერთოდ აკრძალვა.

bpn.ge