„გვაქვს წინადადება, იუსტიციის სახლი გადავიტანოთ მტკვრის მარცხენა სანაპიროზე, ყველაზე მოშორებულ და არაპრესტიჟულ ზონაში“, - ამის შესახებ დეველოპერული კომპანია „არსის“ ერთ-ერთმა დამფუძნებელმა ირაკლი როსტომაშვილმა განაცხადა. ბიზნესმენი ამბობს, რომ ობიექტი არასწორ ადგილზე მდებარეობს. მისი თქმით, არსებული შენობა მრავალფუნქციური უნდა გახდეს და მასში ტურისტული და გასართობი ობიექტები უნდა მოეწყოს. როგორც როსტომაშვილი სოციალურ ქსელში გამოქვეყნებულ ვიდეო მიმართვაში განმარტავს, ამ გადაწყვეტილებით დედაქალაქი ორმაგ ეფექტს მიიღებს – მოხდება პერიფერიის კაპიტალიზაცია, ხოლო ქალაქის ისტორიულ ნაწილს კი ობიექტური დანიშნულება დაუბრუნდება.

„ცალსახად გვინდა აღვნიშნოთ, რომ იუსტიციის სახლი არის ძალიან მნიშვნელოვანი ფუნქციის მატარებელი ობიექტი. სამწუხაროდ არასწორ ადგილზე განთავსებული. მისი ფუნქციის შესრულებისთვის მსგავს ობიექტს არანაირი საჭიროება არ აქვს, რომ ცენტრში იყოს განთავსებული. ისეთივე წარმატებით შეასრულებს თავის ფუნქციას ნებისმიერ პერიფერიულ ზონაში. თუ ავიღებთ თბილისის სპეციფიკას, მარცხენა სანაპიროზე დაახლოებით ერთი მილიონი მოქალაქე ცხოვრობს, ხოლო მარჯვენა სანაპიროზე 300 000. ჩვენი გადატვირთული სატრანსპორტო მოძრაობიდან სანაპიროები, ხიდები, ბევრად უფრო ნაკლებად დაიტვირთება. 4 ჯერ მეტ მოქალაქეს არ მოუწევს ხიდებით და სანაპიროებით სარგებლობა.

არსებულ შენობაში ალბათ უნდა განთავსდეს ტურისტული და გასართობი ობიექტები. ეს არის სასტუმროები, გალერეები, საგამოფენო დარბაზი, სპორტული, სავაჭრო და კვების ობიექტები.

წარმოუდგენლად არასწორად მიგვაჩნია ის ორი ჰექტარი ავტოსადგომი, რომელიც პრაქტიკულად შაბათ-კვირას ქალაქის ცენტრში ცარიელია. ამ ტერიტორიაზე ალბათ უნდა მოეწყოს შერეული ფუნქციის სარეკრეაციო ზონა, რომელიც ძალიან კარგი იქნება ჩვენი თანამოქალაქეებისთვის.

რაც შეეხება ობიექტებს, რომლებიც განთავსებულია იუსტიციის სახლის პირველ სართულებზე ნოტარიუსები, აზომვითი ბიუროები ცხადია გადაჰყვება მარცხენა სანაპიროზე და იქ მოხდება ფართების კაპიტალიზაცია, რაც ძალიან კარგი იქნება იმ ზონაში მაცხოვრებელი ადამიანებისთვის. არსებულ ფართებში კი მოეწყობა ტურისტული დანიშნულების ობიექტები. ეს არის ტურისტული ბიუროები, პატარა სუვენირების მაღაზიები, კაფეები, სამხატვრო გალერეები. ქალაქის ისტორიულ ნაწილში ნოტარიუსი არავის სჭირდება“, - განაცხადა ირაკლი როსტომაშვილმა.

ბაჩო ადამია