ცნობილი ქართველი სამრეწველო დიზაინერი ზვიად ციკოლია თვითმფრინავის ახალ მოდელზე მუშაობას აქტიურად აგრძელებს. ამის შესახებ „კომერსანტს“ თავად დიზაინერმა განუცხადა. მისი თქმით, კორონავირუსით გამოწვეულმა პანდემიამ პერსონალური, სასეირნო, ერთადგილიანი თვითმფრინავის წარმოების პროცესს მცირე პრობლემები შეუქმნა, თუმცა მსუბუქი და თანამედროვე ტექნოლოგიებით აღჭურვილი თვითმფრინავის პროექტირება გრძელდება.
„წინ მივდივართ არ ვჩერდებით, პანდემიამ ხელი შეგვიშალა რაღაცების ჩამოტანაში, მაგრამ წინსვლას სულ მალე ნახავთ. დელტა გვერდში გვიდგას, ფართი გამოგვიყვეს ყველანაირად შეგვიწყვეს ხელი, დანადგარები უკვე დავამონტაჟეთ. ველოდებით საახალწლო პერიოდის შემდეგ ჩვეულებრივი რეჟიმით შევუდგებით მუშაობას. თვითმფრინავების წარმოების რაოდენობა დამოკიდებულია მოთხოვნაზე, თუმცა საქმე იმაშია, რომ გვინდა თვეში 3-4 ცალი მაინც ვაწარმოოთ, ჩვენი სურვილი ეგეთია, სხვანაირად კომერციული გამართლება არ ექნება. როდესაც თვითმფრინავი საერთაშორისო გამოფენაზე გამოიფინება, როდესაც საზოგადოებას და ექსპერტებს, წარვუდგენთ, მფრინავების დასკვნებს ვაჩვენებთ, შემდეგ უფრო მეტი დეტალი გამოიკვეთება. ქართველებს სადღეგრძელოები გვიყვარს, მაგრამ მიწაზე უნდა დავეშვათ და რეალობას შევხედოთ თვალებში. დარწმუნებული ვარ თვითმფრინავებს ეყოლება სერიოზული მომხმარებელი და წარმატებული პროექტი იქნება, მაგრამ თანმიმდევრობა უნდა დავიცვათ შევქმნათ თვითმფრინავი, აფრინდეს და უკვე შემდეგ დაველოდოთ შედეგებს“, - განაცხადა ზვიად ციკოლიამ.
თვითმფრინავის შეძენა ნებისმიერ ადმიანს შეეძლება. ზვიად ციკოლია აცხადებს, რომ ხარჯები ზუსტად ცნობილი არ არის, მაგრამ ფიქრობს, რომ თვითმფრინავის ღირებულება 25 000-დან 30 000 დოლარის ფარგლებში იქნება. გეტყვით, რომ თვითმფრინავი იქნება, ერთ ადგილიანი პირადი მოხმარების. თავისი მონაცემებიდან გამომდინარე, საკმაოდ შორ მანძილზე შეძლებს ფრენას, დაახლოებით 400 კილომეტრზე, ხოლო სიჩქარე ყველა გამოთვლით დაახლოებით 180 კმ/სთ იქნება.
შეგახსენებთ, რომ ზვიად ციკოლია ცნობილი ქართველი სამრეწველო დიზაინერია, რომლის პორტფოლიოში მრავალი პროექტი შედის. მისი ნამუშევრები გამოქვეყნებულია: Carstyling, Auto&Design, Auto Bild, Auto review, Super cars, GQ, Le, Style, Really Good Packaging, Big Book of Packaging, Design and Design და სხვა ჟურნალებში. ხოლო „Tsikolia Watches“, ქართული საათების ბრენდია, რომელიც განსაკუთრებული დიზაინით შვეიცარიაში მზადდება და უკვე წლებია ბაზარზე საკუთარ ნიშას ინარჩუნებს.
ბაჩო ადამია