საქართველოში ღვინის და სპირტიანი სასმელების ერთ-ერთი უმსხვილესი მწარმოებლის „კახური ტრადიციული მეღვინეობის“ მთავარი საექსპორტო ბაზარი რუსეთია . კომპანიის ნახევარწლიურ კონსოლიდირებულ ანგარიშში ვკითხულობთ, რომ KTW ჯგუფმა რუსეთში 6 თვეში 22,9 მლნ. ღირებულების პროდუქცია გაყიდა. მეორე ადგილზე უკრაინაა, მეზობელ ქვეყანაში 20,9 მლნ. ლარის ალკოჰოლური სასმელები გაიყიდა. მას მოსდევს ჩინეთი 0.9 მლნ-ით, შემდეგ მოლდოვა 0,8 მლნ-ით, დიდი ბრიტანეთი 0,6 მლნ-ით, ბელარუსი 0.7 მლნ-ით. დოკუმენტში ვკითხულობთ, რომ რუსეთის ბაზარზე KTW ქართულ კომპანიებს კონკურენციას ფასით უწევს. კომპანიამ ადგილობრივ ბაზარზე 1,1 მლნ ლარის ალკოჰოლური სასმელების რეალიზაცია შეძლო. 2021 წლის 6 თვიან პერიოდში KTW ჯგუფის შემოსავლების 93% ექსპორტზე მოდიოდა.

2021 წლის პირველ ნახევარში KTW -მ 17,1 მილიონი ლარის მოგება მიიღო. წინა წლის ანალოგიურ პერიოდთან შედარებით წმინდა მოგება 3 388 %-ით გაიზარდა. პანდემიური 2020 წელის 6 თვიანი პერიოდში 492,803 ლარის მოგება ჰქონდა, თუმცა მთლიანი წელი წელი ₾15 მლნ-იანი ზარალით დაასრულა. ეს იყო პირველი შემთხვევაა ბოლო 5 წლის განმავლობაში, როდესაც ბიზნესმენ ზურაბ ჩხაიძის კომპანია ზარალზე გავიდა.

შპს „კახური ტრადიციული მეღვინეობა“ 2001 წელს დაარსდა. კომპანიის ძირითადი საქმიანობა არის ღვინის და სპირტიანი სასმელების წარმოება და წარმოებული პროდუქციის საცალო და საბითუმო ვაჭრობა. კომპანიის წილის 100%-ს ბიზნესმენი ზურაბ ჩხაიძე ფლობს. ამჟამად, ჯგუფს აქვს ხუთი მოქმედი ღვინის ქარხანა, მათგან ოთხი კახეთში მდებარეობს, ხოლო ერთი აჭარაში.

 ბაჩო ადამია