ღვინის მაღაზიათა ქსელი „8000 მოსავალი“ მომხმარებელს ახალ პროდუქტს სთავაზობს: „ღვინის ყუთი“ —ღვინის ან ღვინოების ნაკრების გამოწერის სერვისი, რომლის შერჩევაც  მომხმარებლის გემოვნებაზე დაყრდნობით ხდება.  გამომწერს შეუძლია, არჩევანი 4 პაკეტს შორის გააკეთოს ( თვეში 33, 63, 93 ან 183 ლარი) — პაკეტები ღვინის ბოთლების რაოდენობით განხვავდება.

ღვინის ყუთის გამოწერისას, მომხმარებელი იღებს პირადი სომელიეს ყოველთვიურ მომსახურებას, უფასო მიტანას ნებისმიერ შეკვეთაზე, გამომწერის გემოვნების მიხედვით შერჩეულ ღვინოს.

როგორც „8000 მოსავლის“ თანადამფუძნებელი, ირაკლი ჩხაიძე, „კომერსანტთან“ განმარტავს, ყუთის გამომწერი ავსებს ელ.ფოსტაზე მიღებულ კითხვარს. შემდეგ მაღაზიის სომელიე ადგენს ამ მომხმარებლის გემოვნებას და ყოველ თვე არჩევს მისთვის გასაგზავნ ღვინოს ახლად მიღებული ნაკრებიდან.

 „ჩვენთან ხშირად არიან მომხმარებლები, რომლებიც ყოველი სტუმრობისას ახალ გემოებს ეძებენ. კარანტინის პერიოდში „8000 მოსავალი“ აქტიურად გადავიდა ონლაინ გაყიდვებზე. აქ გაჩნდა იდეა, რომ ადამიანებს, რომლებიც მუდმივად უკვეთავდენენ ჩვენი ონლაინ მაღაზიიდან, შეიძლებოდა, სურვილი ჰქონოდათ, გაესინჯათ ახალი, მათთვის უცნობი ღვინოები, რომელსაც ჩვენ შევურჩევდით მათგან დამოუკიდებლად. შესაბამისად, უკვე ერთ კვირაზე მეტია, შევქმენით „ღვინის ყუთი“-ეს არის პროდუქტი, რომლის გამოწერის შემთხვევაშიც მომხმარებელი ყოველთვიურად იღებს მისთვის შერჩეულ ღვინოსა და პერსონალიზებულ სერვისებს. მოკლე დროში „ღვინის ყუთს“ უკვე რამდენიმე ათეული გამომწერი ჰყავს — ძირითადად 63 და 93-ლარიანი პაკეტები შეიძინეს.

მთავარი ისაა, რომ მომხმარებელი არ ყიდულობს მხოლოდ ღვინის ბოთლს, ამ პაკეტში შედის უფასო მიტანის სერვისი მთელი თვის განმავლობაში ყველა  დამატებით შენაძენზეც. ყუთის გამომწერს, ასევე, ჰყავს პირადი სომელიე, რომელთანაც ნებისმიერ დროს შეძლებს დარეკვასა და კონსულტაციის გავლას.

ღვინო, რომელიც გამოწერილ ყუთში დევს, ყოველთვის უფრო იაფი ღირს ვიდრე მაღაზიაში. ამ პროდუქტის მთავარი ხიბლი არის სიახლის მოლოდინი — იმაზე ფიქრი, თუ რა ღვინო მოვა შემდეგ თვეში,“ — განმარტავს ირაკლი ჩხაიძე.

კითხვარის შევსებისას გამომწერი უთითებს იმ თარიღს, რომელშიც სურს ღვინის ყუთის მიღება და ყოველ თვე ავტომატურად იღებს მას მითითებულ მისამართზე.

მარიამ მორგოშია