13 ოქტომბერს საქართველოში ღვინის საერთაშორისო კონკურსი  International Wine & Spirit Competition (IWSC) გაიმართა, 50 წლიანი ისტორიის მქონე საერთაშორისო კონკურსი ყოველ წელს ლონდონში ტარდება და მისი არსებობის ისტორიაში მეორედ და ევროპაში პირველად. ამჯერად კი საქართველოში, მხოლოდ ქართველი მეღვინეებისთვის ჩატარდა.

კონკურსის ფარგლებში IWSC-ის ჟიურის შემადგენლობაში მსოფლიოს წამყვანი ექსპერტები, სომელიეები და ბაიერები იყვნენ. კონკურსის ერთ-ერთი გამარჯვებული მარან „კასრელის“ წარმომადგენელი მიხეილ დოლიძე გახდა.  მარნის 2020 წლის მოსავლის ქვევრის ღვინომ „ერეკლეს ღვინო“ ოქროს მედალი დაიმსახურა.

როგორც გამოცემა vinoge - სთან ინტერვიუში „ერეკლეს ღვინოს“ მწარმოებელმა მიხეილ დოლიძემ აღნიშნა, მისი წარმოებული ღვინო ძირითადად საქართველოს ფარგლებს გარეთ იყიდება, რაც გამოწვეულია იმით, რომ სქართველოში დიდი ბაზარი და სათანადო მოთხოვნა არ არის. მისივე თქმით, საქართველოში ღვინის გაყიდვის დროს კომპანია საკმაოდ მსხვილად იბეგრება, რაც ექსპორტის შემთხვევაში არ ხდება.

„გაყიდვები ძირითადად საქართველოს გარეთ გვაქვს. ეს გამოწვეულია იმით, რომ საქართველოში სამწუხაროდ არაა დიდი ბაზარი და სათანადო მოთხოვნა. გარდა ამისა მნიშვნელოვანია ისიც, რომ საქართველოში გაყიდული ღვინიდან საკმაოდ მსხვილად იბეგრება კომპანია, რაც არ ხდება ექსპორტის შემთხვევაში. ცხადია მხოლოდ ამის გამო არ ვეწევით ექსპორტს და მხოლოდ ეს არაა ექსპორტის მიზანი, თუმცა ერთ-ერთი მნიშვნელოვანი მიზეზი ნამდვილადაა. ღვინოს ვყიდით ევროკავშირის 7 ქვეყანაში, ასევე ამერიკის შეერთებულ შტატებში, იაპონიაში და სამხრეთ კორეაში.

განსაკუთრებით დაინტერესებული ვართ ღვინის დიდ ბრიტანეთში ექსპორტით და რაკი კონკურს IWSC-ის სამშობლო სწორედ დიდი ბრიტანეთია, ვფიქრობთ იქაურ ბაზარზე გასვლაში ეს ჯილდოც დაგვეხმარება“, - აღნიშნა მიხეილ დოლიძემ.

მიხეილ დოლიძე საქართველოში მეღვინეობის დარგიც შეაფასა და განმარტა, რომ ქვეყანაში ღვინის წარმოების ზრდა კარგია, რადგან ეს კონკურენციის ზრდას უწყობს ხელს და ხარისხის მამოძრავებელი ძალა სწორედ კონკუენციაა.

„ღვინის მწარმოებლების რაოდენობის ზრდა არის კარგი, რადგან ეს ხელს უწყობს კონკურენციის ზრდას და სწორედ კონკურენციაა ხარისხის ზრდის მამოძრავებელი ძალა. მეორე გარემოება ისაა, რომ იზრდება ჩემს მიერ უკვე ხსენებული გარე ხარისხის კონტროლი. თუმცა, ძალიან რთული იქნება დაყრდნობა მხოლოდ ფესტივალებზე და კონკურსებზე. ბოლოს იმასაც გეტყვით, რომ ვისურვებდი სახელმწიფო რეგულაციები და ჩარევები (როგორიც მაგალითად არის რთველის სუბსიდირება) იყოს მაქსიმალურად ნაკლები, რადგან ეს ნამდვილად არ ეხმარება ამ დარგის განვითარებას“, - აღნიშნა მიხეილ დოლიძემ.