ლარსისა და სარფის საბაჟო გამშვებ პუნქტებთან სატვირთო მანქანების რიგებია გაზრდილი, ხშირია შეფერხებები. ამ ფონზე რა გამოწვევების წინაშე დგანან გაზრდილი ტვირთბრუნვის გამო გადამზიდავი კომპანიები და რამდენად ეფექტიანად ემსახურება გაზრდილ ტვირთნაკადს საქართველო? ამის შესახებ ტელეკომპანია „BMG“ -ის ეთერში „ქაიროს ლოჯისტიკის“ დირექტორმა მიხეილ ნამადოვმა ისაუბრა. მისი თქმით რიგები გამოწვეულია იმით, რომ საბაჟო პროცედურები დროში იწელება, რის გამოც გადამზიდავ კომპანიებს წარმადობა საგრძნობლად შეუმცირდათ.
„ზოგადად, სატრანზიტო გადაზიდვებისთვის, საქართველოს გავლა დიდ სირთულეს არ წარმოადგენს, სულ 500 კილომეტრიანი რადიუსია. ძირითადი პრობლემა მოდის ჩვენი მეზობელი ქვეყნის მებაჟეების მხრიდან. გაფორმების მხრივ ლიმიტები აქვთ დაწესებული და აქედან გამომდინარე დიდი პრობლემა იქმნება. აქ ასეთი შეფერხებები ნაკლებადაა.
ეს საკითხი დროულად, ჩვენ მეზობელ ქვეყნებთან ერთად უნდა გადაიჭრას, რიგების გამო გზაზე შექმნილ დისკომფორტს, ემატება გაზრდილი გადასახადებიც, რადგან თუ რეისი დროულად არ შესრულდა, სატრანსპორტო ვაკუუმი იქმნება და ფასიც იზრდება“, - აღნიშნა მიხეილ ნამადოვმა
ნამადოვის თქმით გადაზიდვებში 60% სწორედ სატვირთო გადაზიდვებს უჭირავს. შესაბამისად, ამ დარგის მოწესრიგება უმნიშვნელოვანესია, რადგან იმავე ლარსის გამშვებ პუნქტთან არსებული რიგების შედეგები, ხშირად დახლებზე აისახება. რაც ეხება გზით სარგებლობის 150 ლარით გაზრდილ გადასახადს, ნამადოვი ამბობს, რომ ეს ჩვეულებრივი საკითხია, მით უმეტეს ფასის ზრდა 10 წელია არ ყოფილა.
„მთავარია რომ ეს თანხები ინფრასტრუქტურის განვითარებას და რიგი საკითხების მოგვარებას მოხმარდეს. გზითსარგებლობა, როგორც პროდუქტი, რომ წარმოვიდგინოთ ეს დამატებით ღირებულების შექმნის წყარო და დამატებითი პოტენციალია ქვეყნისთვის, ზოგ ქვეყანაში 200-300 ევროს იხდის ადამიანი სერვისსა და კომფორტში. ამ მიმართულებით თუ წავალთ შეიძლება კიდევ გაძვირდეს“, - აღნიშნა მიხეილ ნამადოვმა.
შეგახსენებთ, ქვეყნის საზღვარზე გამავალი ათასობით სატრანზიტო ტრაილერისთვის გზათსარგებლობის მოსაკრებელი 20 ივნისიდან გაძვირდა. აქამდე თითოეული ტრაილერი ამ მოსაკრებლისთვის 200 ლარს იხდიდა, გზათსარგებლობის მოსაკრებელი 350 ლარია. მოსაკრებლის გაძვირებით საქართველოს სატრანსპორტო დერეფნიდან შემოსავლის ათობით მილიონი ლარით გაზრდა შეეძლება.
ოფიციალური სტატისტიკით, ქვეყანას ყოველდღიურად 900-ზე მეტი მძიმე სატვირთო კვეთს, რომელთაც დღეში 17,000 ტონამდე პროდუქტები გადააქვთ.დანიშნულების ქვეყნების მიხედვით, ყველაზე მეტი ტრაილერი სომხეთისკენ მიემართება, შემდეგ არის აზერბაიჯანი, თურქეთი და რუსეთი.