ჰააგის სასამართლომ რუსეთს, ყირიმში „ნაფტოგაზის“ ზარალისა და დაკარგული ქონების საკომპენსაციოდ, 5 მილიარდი დოლარის გადახდა დააკისრა. ამის შესახებ ნაფტოგაზ ჯგუფის ხელმძღვანელმა ალექსეი ჩერნიშევმა განაცხადა, რომლის განცხადებაც კომპანიამ გამოაქვეყნა.
„მიუხედავად რუსეთის მცდელობებისა, ხელი შეუშალოს მართლმსაჯულებას, საარბიტრაჟო ტრიბუნალმა დაავალა რუსეთის ფედერაციას 5 მილიარდი დოლარის ზარალის კომპენსაცია „ნაფტოგაზისთვის“. ახლა რუსეთმა უნდა შეასრულოს ეს გადაწყვეტილება საერთაშორისო კანონმდებლობით ნაკისრი ვალდებულებების შესაბამისად“, - განაცხადა „ნაფტოგაზ“ ჯგუფის ხელმძღვანელმა ალექსეი ჩერნიშევმა, .
ეს გადაწყვეტილება ჰააგის მუდმივმოქმედ საარბიტრაჟო სასამართლოს ტრიბუნალმა 2023 წლის 12 აპრილს მიიღო.
საარბიტრაჟო ტრიბუნალმა დაადასტურა, რომ რუსეთმა სრულად უნდა აანაზღაუროს „ნაფტოგაზისთვის“ მიყენებული ზიანი რუსეთის მიერ ყირიმში „ნაფტოგაზ ჯგუფის“ კომპანიების აქტივების უკანონო ჩამორთმევისთვის.
„საარბიტრაჟო გადაწყვეტილება შეიძლება აღსრულდეს სააღსრულებო მექანიზმით. ამიტომ, იმ შემთხვევაში, თუ რუსეთი უარს იტყვის სასამართლო გადაწყვეტილების ნებაყოფლობით აღსრულებაზე, 1958 წლის ნიუ-იორკის კონვენციის შესაბამისად, „ნაფტოგაზს“ უფლება აქვს დაიწყოს გადაწყვეტილების აღიარებისა და აღსრულების პროცესი იმ სახელმწიფოების ტერიტორიაზე, სადაც რუსეთის ფედერაციის აქტივები მდებარეობს“, - აცხადებენ „ნაფტოგაზში“.
„ამ გადაწყვეტილებით დადგენილი კომპენსაციის ოდენობა არის ყველაზე დიდი თანხა, რომელიც საერთაშორისო საარბიტრაჟო ტრიბუნალმა დააწესა, როგორც კომპენსაცია რუსეთის მიერ ყირიმში აქტივების ექსპროპრიაციისთვის“, - ნათქვამია „ნაფტოგაზის“ განცხადებაში.