ოპეკის წევრებს შორის ყველაზე მწვავე კამათებიც კი, როგორც წესი, გარეთ არ გადის და პრობლემები დახურულ კარს მიღმა წყდება. ამჯერად სულ სხვა ვითარებაა  - არაბთა გაერთიანებული საემიროების ენერგეტიკის მინისტრმა CNBC-სთვის მიცემულ ინტერვიუში განაცხადა, რომ მის ქვეყანას ნავთობმოპოვების ზრდის „სუვერენული უფლება აქვს“.

საპასუხოდ, ასევე საჯაროს, Bloomberg TV-ს ეთერში,  მას საუდის არაბეთის ენერგეტიკის მინისტრმა აბდელ აზიზ ბენ სალმანმა უპასუხა:

„ქვეყანათა მთელი ჯგუფი ერთი ქვეყნის წინაამღდეგ გამოდის. ოპეკი ვერანაირად ვერ დათანხმდება ნავთობის მოპოვების ზრდას. ჩვენ ამას ვერ გავაკეთებთ“, - განაცხადა მან.

ის, რომ ორი არაბული ქვეყნის ენერგეტიკის მინისტრები ერთმანეთს დასავლური ტელეარხების მეშვეობით ელაპარაკებიან, ნათლად აჩვენებს, რომ ნდობა კარტელის შიგნით მინიმუმზეა. ოპეკის შიგნით შეუთანხმებლობამ ჯერ კიდევ 2020 წლის მარტში, პანდემიის დროს, ნავთობის ფასები ჩამოშალა, დღეს შიდა დაპირისპირებამ შესაძლოა იგივე შედეგები გამოიწვიოს.

ამ ეტაპზე, მოკლევადიან პერსპექტივაში, მოთხოვნა ნავთობზე არ შემცირდება და ფასების ზრდა გაგრძელდება - დღეს ბაზარზე ნავთობის დეფიციტია, რომლის შევსებასაც რამდენიმე თვე დასჭირდება.

შესაძლოა ამ ვითარებაში ნავთობი 80 დოლარამდეც გაძვირდეს. ასე რომ, საემიროების პოზიციას გარკვეული ლოგიკა აქვს.

თუმცა, ეს რამდენიმე თვე გაივლის და უკვე შემოდგომაზე ნავთობის ბაზარზე შესაძლოა საპირისპირო ტენდენციები განვითარდეს. დეფიციტი ჩაცხრება, მიწოდება აღდგება და ფასების კლება განახლდება  - ამ დროს ოპეკის წევრებს შორის ერთიან პოზიციას გადამწყვეტი მნიშვნელობა ექნება.

თუ განხეთქილება კარტელის რიგებში არ დაიძლევა, ეს ახალ ვითარებას შექმნის, როდესაც ყველა იმდენ ნავთობს მოიპოვებს, რამდენიც უნდა და რამდენიც შეუძლია. ბაზარზე დეფიციტს  ჭარბი მიწოდება შეცვლის, ეს კი ფასების კლებას აუცილებლად გამოიწვევს.

2020 წლის აპრილში საუდის არაბეთი, რუსეთი, და ოპეკ+ შეთანხმდნენ მოპოვების შემცირებაზე  და შემდგომ მის ეტაპობრივ გაზრდაზე 2022 წლის ბოლომდე.

ამის წინაამღდეგ გამოდის საემიროების დელეგაცია და მოპოვების ზრდის დაჩქარებას მოითხოვს. ამავე დროს საემიროები შეთანხმების 2022 წლამდე გაგრძელების წინაამღდეგია - ქვეყნის მთავრობა მიიჩნევს, რომ უკვე 2021 წელს, წარმატებული ვაქცინაციის ფონზე, მსოფლიო ეკონომიკა თითქმის ბოლომდე აღდგება - ამიტომაც 2022 წლამდე შეზღუდვების გაგრძელებას არავითარი აზრი არა აქვს.

ამ მოთხოვნის დაკმაყოფილების შემთხვევაში, საემიროები მსოფლიოში მე-2 ან მე-3 ნავთობმომპოვებელი ქვეყანა გახდება.

საემიროებს საუდის არაბეთის ჩრდილიდან გამოსვლა და საკუთარი გზით სიარული როგორ ეკონომიკაში, ასევე პოლიტიკაშიც სურთ - ამაზე მეტყველებს თუნდაც  სამშვიდობო შეთანხმება ისრაელთან, რომელიც დონალდ ტრამპის შუამავლობით შედგა.

ანალიტიკოსების აზრით. ქაოსი და გაურკვევლობა ნავთობის ბაზარზე, საბოლოო ჯამში, ყველას ერთნაირად დააზარალებს. ამიტომაც, სავარაუდოდ, ოპეკის წევრი ქვეყნები მოლაპარაკებათა მაგიდასთან დაბრუნებას საბოლოო ჯამში მაინც მოახერხებენ.

თუმცა, შესაძლოა, ეს მარტივი არ იყოს, და მანამდე ნავთობის ფასი კიდევ რამდენიმეჯერ შეიცვალოს..

handelsblatt.com