2023 წლის პირველ კვარტალში გერმანული Henkel AG აპირებს, რომ რუსეთში ბიზნესი გაყიდოს. ამის შესახებ კომპანიის აღმასრულებელმა დირექტორმა კარსტენ კნობელმა ჟურნალ WirtschaftsWoche-თან ინტერვიუში განაცხადა.
გენერალური დირექტორის თქმით, პროცესი ძალიან რთულია. ხელშეკრულებას ხელს აწერენ არა მხოლოდ მყიდველი და გამყიდველი. რუსეთის ხელისუფლების მხრიდან უამრავი მოთხოვნაა, რომელიც უნდა დაკმაყოფილდეს.
კომპანიისთვის ძალიან მნიშვნელოვანი იყო რუსული ბაზარი. 2021 წელს ქვეყანაში გაყიდვებმა დაახლოებით 1 მილიარდი ევრო შეადგინა, რაც Henkel-ის მთლიანი შემოსავლის თითქმის 5%-ია.
კომპანიამ რუსეთში 200 მილიონი ევროს ზარალი უკვე ჩამოწერა. კნობელის ინფორმაციით, Henkel-ის ფინანსურ ანგარიშგებაში რუსეთის ფედერაციაში ოპერაციები დაახლოებით 500 მილიონ ევროდ არის შეფასებული.
„დღევანდელ პირობებში, რა თქმა უნდა, ვერ გავყიდით ბიზნესს მისი რეალური ღირებულებით, - განაცხადა კომპანიის აღმასრულებელმა დირექტორმა. - შემდგომი ჩამოწერა დამოკიდებულია იმაზე, თუ რა იქნება გასაყიდი ფასი.
მისი თქმით, ბიზნესის მყიდველი, სავარაუდოდ, რუსი ინვესტორების კონსორციუმი იქნება. პროცესის დასაწყისში რამდენიმე საერთაშორისო კომპანიამ გამოთქვა ინტერესი, მაგრამ ახლა გაყიდვა ორიენტირებულია რუს მყიდველებზე. „ჩვენი ბიზნესის მრავალფეროვნებისა და ზომის გამო, ჩვენ გვჯერა, რომ სხვადასხვა მყიდველებისგან შემდგარი კონსორციუმი უკეთესი შანსია“, - განაცხადა კნობელმა.