რა უნდა გააკეთოს ახალმა პარლამენტმა და მთავრობამ ბიზნესისთვის მაშინ, როდესაც ლარის კურსი რეკორდულ მაჩვენებელს უახლოვდება, მოთხოვნა შემცირებულია და თითქმის ყველა სექტორი პანდემიით გამოწვეულ ფინანსურ კრიზისთან გამკლავებას ცდილობს?

საქართველოს ბიზნეს ასოციაციის აღმასრულებელი დირექტორი, ლევან ვეფხვაძე „კომერსანტთან“ საუბრობს რეგულაციებზე, დახმარებების გაგრძელების აუცილებლობაზე და ბიზნესისთვის დაგროვილი გადასახადების სრულად ჩამოწერაზე - მისი თქმით, ეს პირველი აუცილებლად გადასადგმელი რამდენიმე ნაბიჯია ახალი მმართველი გუნდის მხრიდან და ამბობს, რომ ახალმა პარლამენტმა ქვეყნის მსყიდველუნარიანობა უნდა გაითვალისწინოს და გადახედოს იმ რეგულაციებს, რაც ბიზნესს ამ პერიოდში ყველაზე მძიმე ტვირთად აწვება.

„ მთავარი პრობლემა რაც ბიზნესს აქვს არის ქეში. უნდა  ვიფიქროთ კომპანიებისთვის იმ შეღავათების  გაგრძელებაზე, რაც  აქამდე  იყო.  მაგალითად, საშემოსავლო გადასახადებთან დაკავშირებით, რაც 1500 ლარიან  ხელფასებზე  რაც  მოქმედებდა.

 პრობლემა,  რომელიც ჩვენ სტუმარმასპინძლობის და კვების ინდუსტრიაში გვაქვს უკავშირდება  გადავადებულ ვალდებულებებს და ეს ვალდებულება არის  საშემოსავლო გადასახადის, რომელიც 4 თვით გადაუვადეს და ახლა უჩნდებათ ვალდებულება, რომ პირველი დეკემბრიდან 1 იანვრამდე უნდა დაფარონ.

თავის დროზე ყველა დარწმუნებული იყო იმაში, რომ ეს სექტორი  გაცოცხლდებოდა, მაგრამ  ვხედავთ, რომ ასე არ მოხდა. შესაბამისად, დაგროვილ დავალიანებას მით უფრო ვერ გადაიხდიან და ეს თანხა ნებისმიერ  შემთხვევაში არის  ჩამოსაწერი. ეს საკითხი ახალმა პარლამენტმა უნდა განიხილოს,“ - ამბობს ვეფხვაძე.  

ლევან ვეფხვაძე DCFTA-ს შეთანხმებით გათვალისწინებულ რეგულაციების გადახედვასაც მოითხოვს და მიიჩნევს, რომ ახალმა პარლამენმა უნდა გაითვალისწინოს, რომ ქვეყანა დაბალმსყიდველუნარიანია და ამ ტიპის რეგულაციები ბიზნესს ტვირთად აწვება.

„ძალიან მნიშვნელოვანია, რომ გადაიხედოს ის პოლიტიკა, რომელიც  უკავშირდება რეგულაციებს. ევროკავშირთან  შეთანხმების  შედეგად იცით, რომ 40-მდე დირექტივა უნდა გადმოგვეღო ჩვენს ადგილობრივ კანონმდებლობაში და  ამ  დირექტივების ნაწილი აჩენს გარკვეულ ფინანსურ წნეხს კომპანიებზე.  ჩვენ გავიაროთ ეს პრობლემები და ევროკავშირთანაც უნდა დავიწყოთ მოლაპარაკება, რომ ეს ვალდებულებები ან გადავადდეს, ან  ამოქმედება  გადაიწიოს, სწორედ იმიტომ, რომ ამ კომპანიებზე ზედმეტი  წნეხი ახლა არ არის სასურველი.

DCFTA ნიშნავს თავისუფალ ვაჭრობას ერთის მხრივ და  მეორეს მხრივ ნიშნავს  ვალდებულებებს როგორც შრომის ნაწილში,  ასევე  კონკურენციის ნაწილში. ეს მოითხოვს კონკრეტული ინდუსტირების  რეგულირებას, დამატებითი რეგულაციების შემოღებას.

დაბალმსიყდველუნარიანობის ქვეყნებისთვის, როგორიც ჩვენ ვართ რეგულაციების  შემოღება მნიშვნელოვან  გავლენას  ახდენას პროდუქციის  წარმოების ღირებულებაზე. ბუნებრივია, რომ ის ახდენს გავლენას მითუმეტეს ახლა,  როცა ქეშის პრობლემა  აქვს  კომპანიებს,“ - განმარტავს ლევან ვეფხვაძე.

მარიამ მორგოშია