არაკვალიფიციური მენეჯმენტი, საბანკო ვალდებულებები და ცვალებადი ჯანდაცვის პოლიტიკა - ჰოსპიტალურ სექტორში მნიშვნელოვანი რყევებია მოსალოდნელი.  ამის შესახებ „კომერსანტთან“ ბიზნეს კონსულტანტი, პარლამენტის ჯანმრთელობის დაცვისა და სოციალურ საკითხთა კომიტეტის უკვე ყოფილი წევრი ლევან კობერიძე საუბრობს. იგი ამბობს, რომ ჰოსპიტლურ სექტორს შემოსავლის 70-80% სახელმწიფო პროგრამებიდან აქვს, ამ გარანტიით კი  დიდი რაოდენობით სესხია გაცემული. მისი თქმით, კლინიკებს ეს მძიმე ტვირთად აწვეს. ახალ კი, როცა საქართველოს მთავრობა აქტიურად მუშაობს ჯანდაცვის ახალ პოლიტიკაზე, ლევან კობერიძის თქმით, შესაძლოა ძალიან ბევრი ცნობილი კლინიკა მნიშვნელოვანი პრობლემების წინაშე აღმოჩნდეს.

„ჰოსპიტლური სექტორის შემოსავლის ძირითად ნაწილს სახელმწიფო პროგრამები შეადგენს. კლინიკებს ამ სახელმწიფო პროგრამების გარანტიით ძალიან დიდი ფინანსური ვალდებულებები აქვთ აღებული - იქნება ეს ახალი მშენებლობები, ინვენტარი თუ მაღალტექნოლოგიური ტექნიკის საბანკო ვალდებულებები. 520-ე დადგენილებამ საკმაოდ მნიშვნელოვანი დარტყმა მიაყენა კარდიოლოგიურ მიმართულებას. ამ ყველაფერს ემატება ის, რომ სადაზღვევო სექტორის წილი ჰოსპიტლების შემოსავლებში არის ძალიან მცირე. შესაბამისად ვფიქრობ, რომ უახლოს სამ წელიწადში ჰოსპიტალურ სექტორში დიდი რყევები იქნება. რაც არც თუ ისე სახარბიელოდ აისახება პირველ რიგში მოქალაქეებისთვის სამედიცინო სერვისების მიწოდების ნაწილში.

პრობლემას ვხედავ იმაში, რომ ჰოსპიტალური სექტორი ერთის მხრივ, ბიზნესის მართვის კუთხით საკმაოდ არაკვალიფიციურად იმართება. ექიმებმა ერთ დღეს გადაწყვიტეს, რომ ბიზნესმენები გამხდარიყვნენ, ამის გამო ბევრი რამ არასწორად მართეს. თუ ბიზნესია, ბიზნესის წესებით უნდა ხდებოდეს თამაში და მხოლოდ სახელმწიფო პროგრამებზე არ უნდა იყო დამოკიდებული. მაშინ, როდესაც სახელმწიფო აპირებს, რომ ჯანდაცვის პოლიტიკას გადახედოს, დიდი ალბათობით კლინიკები სერიოზული ფინანსური პრობლემების წინაშე აღმოჩნდებიან.  უახლოეს პერიოდში ალბათ ბევრი კლინიკა გაიყიდება, ან შეერთდება, ზოგიერთი გაკოტრდება კიდეც.

პრობლემა, რომელზეც ვსაუბრობ, შეარბილა კორონავირუსით გამოწვეულმა პანდემიამ, რადგან სახელმწიფო კოვიდ პაციენტების სამკურნალო კლინიკებს თანხას პირდაპირ უხდიდა, რა დროსაც მათ დამატებითი შემოსავალი გაუჩნდათ“, - განაცხადა ლევან კობერიძემ.

ჯანმრთელობის დაცვისა და სოციალურ საკითხთა კომიტეტის ყოფილი წევრი ფიქრობს, რომ პრობლემიდან ყველაზე ეფექტური გამოსავალი საყოველთაო სავალდებულო დაზღვევაა. მისი თქმით, მხოლოდ ამ შემთხვევაში იქნება შესაძლებელი ჯანდაცვის სექტორში არსებული მდგომარეობის უკეთესობისკენ სწრაფად შეცვლა და მოქალაქეებისთვის ხარისხიანი სამედიცინო მომსახურების მიწოდება.

ბაჩო ადამია