HSBC Holdings-ი ამერიკული Silicon Valley Bank-ის გაერთიანებული სამეფოს განყოფილებას შეიძენს, რომელიც აშშ-ს მარეგულირებლებმა 10 მარტს დახურეს. HSBC-ის განცხადებაში აღნიშნულია, რომ მისი HSBC UK Bank-ის განყოფილება Silicon Valley Bank UK-ს 1 გირვანქა სტერლინგად ყიდულობს. ამის შესახებ Financial Times-ი წერს.
„გარიგებას დიდი სტრატეგიული მნიშვნელობა აქვს ჩვენი ბიზნესისთვის დიდ ბრიტანეთში,“ - თქვა HSBC-ის აღმასრულებელმა დირექტორმა ნოელ ქუინმა. „SVB UK კლიენტებს შეუძლიათ განაგრძონ ბანკით სარგებლობა და დარწმუნებული იყვნენ, რომ მათი დეპოზიტების სტაბილურობა და უსაფრთხოება გარანტირებული იქნება“.
რამდენიმე საათის შემდეგ, რაც აშშ-ს მარეგულირებლებმა აშშ-ში Silicon Valley Bank-ის დახურვის შესახებ გამოაცხადეს, ინგლისის ბანკმა განაცხადა, რომ იძულებული იყო SVB-ს ბრიტანული ფილიალიც უუნაროდ გამოეცხადებინა.
SVB UK, მიუხედავად იმისა, რომ გაერთიანებული სამეფოს უმსხვილეს ბანკებთან შედარებით პატარა ბანკია, დიდ როლს თამაშობს სტარტაპერთა სამყაროში. ამიტომ, ქვეყნის მთავრობა ცენტრალურ ბანკთან და უამრავ სხვა მარეგულირებელთან ერთად მთელი შაბათ-კვირა ეძებდნენ მისაღებ გადაწყვეტილებებს, რომლითაც SVB UK მომხმარებლებს პოტენციური პრობლემებისგან დაიცავდნენ, წერს Financial Times.
SVB UK-ს დაახლოებით 3,3 ათასი კლიენტი ჰყავს ბრიტანეთში, მათ შორის სარისკო კაპიტალის ინვესტორების მიერ დაფინანსებული სტარტაპები, წერს გამოცემა.
კალიფორნიის ფინანსური დაცვისა და ინოვაციების დეპარტამენტმა Silicon Valley Bank 10 მარტს დახურა. ეს იყო ყველაზე დიდი საბანკო კოლაფსი 2008 წლის ფინანსური კრიზისის დროს Washington Mutual Inc. ბანკის გაკოტრების შემდეგ.
2022 წლის 31 დეკემბრის მდგომარეობით, Silicon Valley Bank-ის მთლიანმა აქტივებმა შეადგინა თითქმის $209 მილიარდი, დეპოზიტების მთლიანი მოცულობა დაახლოებით $175.4 მილიარდი იყო. დაუზღვევი დეპოზიტების ოდენობა დადგინდება მას შემდეგ, რაც FDIC მიიღებს დამატებით ინფორმაციას ბანკისა და მომხმარებლებისგან.