საერთაშორისო უფლებადამცველმა ორგანიზაცია Human Rights Watch-მა 12 იანვარს ყოველწლიური ანგარიში გამოაქვეყნა, სადაც ერთი თავი საქართველოს ეთმობა.

უფლებადამცველი ორგანიზაციის ანგარიშში 2022 წელს ქვეყანაში ადამიანის უფლებათა დაცვის კუთხით განვითარებულ მოვლენებია განხილული, მათ შორის მედიის თავისუფლების, დანაშაულების არასათანადო გამოძიების, შრომით უფლებების, ქალთა და ლგბტ უფლებების დარღვევის მიმართულებით.

დოკუმენტის შრომითი უფლებების ქვეთავში აღნიშნულია, რომ სამუშაო ადგილზე მომხდარი უბედური შემთხვევების შედეგად, იანვრიდან სექტემბრის ჩათვლით, საქართველოში 23 ადამიანი დაიღუპა და 230 დაშავდა.

ქალთა უფლებების ქვეთავში ნათქვამია, რომ 2022 წლის იანვრიდან სექტემბრის ჩათვლით, საქართველოში 13 ქალი მოკლეს და 11-ის მკვლელობა ოჯახის წევრებმა სცადეს. ანგარიშში ასევე აღნიშნულია, რომ სასამართლოები მოძალადეებს, ხშირად, გირაოთი ათავისუფლებენ, რომლებიც გათავისუფლების შემდეგ მსხვერპლზე ძალადობას აგრძელებენ.

მედიის თავისუფლების ქვეთავში მოხვდა „მთავარი არხის“ დირექტორ ნიკა გვარამიასთვის პატიმრობის მისჯის საქმე და სასამართლოს გადაწყვეტილების მიმართ სამოქალაქო საზოგადოების მხრიდან კრიტიკა.

ამას გარდა, ჟურნალისტების შევიწროების მაგალითებად მოყვანილია: „მთავარი არხის“ ჟურნალისტ ემა გოგოხიასა და მის ოპერატორზე, ასევე „ტელეკომპანია პირველის“ ოპერატორ მურმან ზოიძეზე განხორციელებული თავდასხმები, ვატო წერეთლისთვის ქართული ოცნების დეპუტატების მხრიდან სავარაუდო ფიზიკურ შეურაცხყოფის ფაქტი და საქართველოს საზოგადოებრივი მაუწყებლის „პირველი არხის“ ჟურნალისტების მიერ კრიტიკული მასალების მომზადებისას ხელმძღვანელობის მხრიდან ცენზურის ფაქტები.

სამართალდამცავთა მიერ ჩადენილი დანაშაულების არასათანადო გამოძიების ქვეთავში სახელმწიფო ინსპექტორის სამსახურის გაუქმების შესახებაა ყურადღება გამახვილებული. დოკუმენტში აღნიშნულია, რომ „ეს მოულოდნელი გადაწყვეტილება ხელისუფლებამ მას შემდეგ მიიღო, რაც სახელმწიფო ინსპექტორმა პატიმრობაში მყოფი ყოფილი პრეზიდენტის, მიხეილ სააკაშვილის მიმართ შესაძლო არასათანადო მოპყრობისა და მონაცემთა დაცვის კანონმდებლობის დარღვევის გამოძიება დაიწყო“.

ანგარიშის თანახმად, 2022 წლის ოქტომბრის მდგომარეობით ომბუდსმენის აპარატში ციხის პერსონალისა და პოლიციის მხრიდან შესაძლო არასათანადო მოპყრობის შესახებ 70 საჩივარი შევიდა, რომელთაგანა 61-ზე გამოძიება დაწყებული იყო, დანარჩენ 9-ზე კი – გამოძიების დაწყების თხოვნით შესაბამის უწყებას სახალხო დამცველის აპარატმა მიმართა.

ლგბტ უფლებების ქვეთავში ნათქვამია, რომ გასული წლის მაისში, თბილისში 5 ტრანსგენდერ ქალზე მათსავე საცხოვრებელ სახლში მოხვდა თავდასხმა, რომელსაც თან მოკვლის მუქარა ერთოდა.