ლარი ყოველდღიურად გამყარების ახალ რეკორდებს ხსნის. ეროვნული ბანკის მიერ გამოქვეყნებული მონაცემების მიხედვით, გუშინდელი ვაჭრობის შედეგად აშშ დოლარის ღირებულებამ 2.5973 ლარი შეადგინა, ამაზე დაბალი მაჩვენებელი ბოლოს 2018 წლის სექტემბერში დაფიქსირდა.

ლარის გამყარების მიზეზებზე Galt&Taggart-ის ეკონომისტმა, ლაშა ქავთარაძემ ისაუბრა და აღნიშნა, რომ ეროვნული ვალუტის ასეთ ტენდენციაზე მთავარ გავლენას საგარეო შემოდინებები ახდენს.

„ლარის გამყარების ერთ-ერთი მთავარი ფაქტორი საგარეო შემოდინებების ზრდაა, თუმცა უნდა აღინიშნოს რომ ეროვნულ ვალუტაზე ბევრი სხვა ფაქტორიც მოქმედებს. 2022 წელს დაწყებული შემოდინებების ზრდა, წელსაც გრძელდება. მაგალითად უცხოური ბარათებით გადახდების დინამიკასა და ტურიზმის შემოსავლების ზრდაზე დაფუძნებით გვაქვს შეფასებები გაკეთებული. ჩვენი ინფორმაციით, წლის პირველ ორ თვეში ტურიზმის შემოსავალი შესაბამისად 300 მილიონი და 307 მილიონი ლარი იყო, რაც დიდი ნაკადია. ვფიქრობთ, თუ ეს ტენდენცია გაგრძელდა,  ტურიზმი 15%-ით ან უფრო მეტადაც კი გაიზრდება“ - განაცხადა ლაშა ქავთარაძემ.

Galt&Taggart-ის ინფორმაციით, იანვრის მონაცემებიდან გამომდინარე გაიზარდა ალბათობა, რომ საქართველოს ეკონომიკა წელს 6.9%-ით გაიზრდება. საინვესტიცო ბანკის პროგნოზით, 2023 წელს ეკონომიკური ზრდის ოპტიმისტური სცენარის რეალიზების შემთხვევაში, საშუალო წლიური ინფლაცია 5.2%-ის ნაცვლად, 6%-ის დონეზეა მოსალოდნელი.