იაპონია შუა დერეფნის შესაძლებლობებს იკვლევს. იაპონიის დელეგაცია, რომელიც საჯარო და კერძო სექტორის წარმომადგენლებისგან იყო დაკომპლექტებული აზერბაიჯანს ტრანსკასპიური საერთაშორისო სატრანსპორტო მარშრუტის (TITR/შუა დერეფნის) შესაძლებლობების შესასწავლად სტუმრობდა.
დელეგაციამ შეხვედრა გამართა აზერბაიჯანის ციფრული განვითარებისა და ტრანსპორტის მინისტრის მოადგილესთან რაჰმან გუმმატოვთან. როგორც სამინისტროში განმარტავენ, მინისტრის მოადგილემ იაპონიის დელეგაციას შუა დერეფნის შესაძლებლობები გააცნო და ყურადღება გაამახვილა სატარიფო პოლიტიკის ჰარმონიზაციის, საზღვრის გადაკვეთის პროცედურების გამარტივებისა და ამ მარშრუტის დიგიტალიზაციის აუცილებლობაზე.
მინისტრის მოადგილის თქმით, აზერბაიჯანი თურქეთთან და საქართველოსთან ერთად ცდილობს თანმიმდევრულად გაზარდოს ბაქო-თბილისი-ყარსის (BTK) სარკინიგზო მაგისტრალის გამტარუნარიანობა, „რომელიც სასიცოცხლო მნიშვნელობისაა შუა დერეფანში“.
შეხვედრაზე აღინიშნა, რომ შუა დერეფნის დიგიტალიზაცია ერთ-ერთი უმნიშვნელოვანესი ინსტრუმენტია სატრანზიტო მოძრაობის გამჭვირვალობისა და გადამზიდავებისთვის თანაბარი პირობების უზრუნველსაყოფად.
TITR არის საერთაშორისო სატრანსპორტო დერეფანი, რომელიც გადის ჩინეთის, ყაზახეთის, კასპიის ზღვის, აზერბაიჯანის, საქართველოსა და შემდგომ თურქეთსა და ევროპის ქვეყნებში.