იენი პოზიციებს კარგავს. მიმდინარე წელს იაპონური ვალუტა აშშ დოლართან მიმართებაში 14%-ით გაუფასურდა და პირველად 1998 წლის შემდეგ კურსმა 130.0-იანი ნიშნული გადალახა.
Financial Times ანალიტიკოსების პროგნოზზე დაყრდნობით აცხადებს, რომ ვარდნა დიდხანს არ გაგრძელდება და ამჟამინდელი გაუფასურება მხოლოდ მოკლევადიან ციკლურ ფაქტორებს ასახავს.
40 წლის წინ, 1982 წელს 1 აშშ დოლარის ღირებულება 240 იენს შეადგენდა, 30 წლის წინ, 1992 წელს 130 იენს, ოდნავ უფრო დაბალი იყო კურსი 2002 წელს. 2008 წელს კურსი 100.0-იან ნიშნულს ჩამოსცდა, 2011 წელს 80.0-იან ნიშნულსაც. გაუფასურება 2013 წელს დაიწყო და 2015 წელს დოლარის ფასმა 125 იენს მიაღწია. 2022 წლის დასაწყისში კურსი 115.0 იყო ახლა კი მცირედით 130.0-საც აჭარბებს.
2021 წლის მდგომარეობით იაპონური იენი მსოფლიოს სარეზერვო ვალუტებს შორის დოლარსა და ევროს შემდეგ 5.6%-იანი წილით მე-3 ადგილს იკავებდა, რითაც ბრიტანულ გირვანქას 0.8%-ით, ჩინურ იუანს 2.8%-ით უსწრებდა.
იენი ერთადერთი ვალუტა არაა, რომელიც დოლართან მიმართებაში გაუფასურდა. 24 წლიან მინიმუმამდე არა, მაგრამ ევრო-დოლარის კურსი 1.05-მდე შემცირდა, რაც 6 წლიანი მინიმუმია.
იანვრიდან დღემდე დოლართან მიმართებაში სხვა ვალუტებიც გაუფასურდა, კერძოდ: შვედური კრონა 8%-ით, ბრიტანული გირვანქა 7.5%-ით, შვეიცარიული ფრანკი 6.9%-ით, ახალ ზელანდიური დოლარი 5.2%-ით, კანადური დოლარი 1.2%-ით, ავსტრალიური დოლარი ასევე 1.2%-ით.