იაპონური სატრანსპორტო კომპანია Nishida Shoun თავისი სატვირთო მანქანებისთვის ბიოდიზელურ საწვავს პოპულარული წვნიანის, რამენის ბულიონისგან ამზადებს. ამის შესახებ Kyodo News-ი წერს.

გამოცემის ინფორმაციით, კომპანიის პრეზიდენტმა, მუსუმი ნისიდამ საწვავის დამზადებისთვის ბულიონის გამოყენება ჯერ კიდევ 2013 წელს გადაწყვიტა. მაშინ ერთ-ერთი რესტორნის ადმინისტრატორმა ჰკითხა შესაძლებელია თუ არა რამენის ნარჩენების გამოყენება, რადგან მათი უტილიზაციისთვის რესტორანს დამატებითი თანხის გადახდა უწევდა.

ნისიდამ შექმნა მოწყობილობა, რომელიც ბულიონიდან ცხიმს გამოყოფს. ახლა კი Nishida Shoun-ის თანამშრომლები რამენისგან მიღებულ ქონს მცენარეული ზეთისგან მიღებულ საწვავთან აზავებენ და მიღებულ საწვავზე კომპანიის რამდენიმე სატვირთო მანქანა უკვე მუშაობს. სექტემბერში კი მასზე Nishida Shoun-ის 170-ვე ავტომობილი გადავა. კომპანია 2 ათასზე მეტ საკვებ ობიექტთან თანამშრომლობს და დღეში 3 ათასამდე ლიტრ საწვავს ამზადებს.

„თავიდან ქიმია არ მესმოდა, ყველაფერს ცდებისა და შეცდომების მეთოდით ვაკეთებდი. მაგრამ ეკოლოგიისადმი მიყენებული ზიანი სერიოზული პრობლემა გახდა, ამიტომ ვვითარდებოდი და ამან შედეგი გამოიღო, - განაცხადა ნისიდამ.

ამასთან, მისი მიღწევა უნიკალური არ არის - ცხოველურ ცხიმებზე დამზადებულ ბიოდიზელურ საწვავს სხვადასხვა ქვეყანაში დიდი ხანია იყენებენ.

imedinews.ge