იაპონური საინვესტიციო ჯგუფი „მწვანე ქალაქის“ პროექტში ჩართვითაა დაინტერესებული. აჭარის მთავრობის თავმჯდომარე თორნიკე რიჟვაძემ იაპონურ საინვესტიციო ჯგუფთან შეხვედრა გამართა. საინვესტიციო ჯგუფი დაინტერესებულია ,,მწვანე ქალაქის“ პროექტით და აქტიურად მუშაობს პროექტის ინვესტორებთან.
აჭარის მთავრობის თავმჯდომარემ სტუმრებს რეგიონის საინვესტიციო და ტურისტული პოტენციალი გააცნო. შეხვედრაზე განიხილეს რეგიონის ბიზნეს გარემო, გაზრდილი ტურისტული ნაკადები, თანამშრომლობის სამომავლო პერსპექტივები.
როგორც ცნობილია, 2019 წელს აჭარაში უპრეცედენტო ღირებულების მქონე საინვესტიციო პროექტის განხორციელება დაანონსდა. ქობულეთში, 180 ჰა ფართობზე მულტიფუნქციური „მწვანე ქალაქი“ უნდა აშენდეს, რისთვისაც ნახევარი მილიარდი ლარის ინვესტიცია განხორციელდება.
პროექტის განაშენიანების გეგმის თანახმად, კომპლექსის ტერიტორიის 70 პროცენტს რეკრეაციული ზონა დაიკავებს.
პროექტს კომპანია „გრინ რეზორტი“ ახორციელებს. უმსხვილესი ინვესტიცია აჭარის ოთხსეზონიან კურორტად გადაქცევას უზრუნველყოფს.
„მწვანე ქალაქის“ პროექტში გათვალისწინებულია გოლფის მოედანი, საფეხბურთო მოედნები, საჩოგბურთო კორტები, საცურაო აუზები, რეკრეაციული ზონები. ასევე აშენდება 250 ნომრიანი მაღალი კლასის სასტუმრო და ერთ-ერთი ყველაზე დიდი სპა-ცენტრი ევროპაში. პროექტში ასევე გათვალისწინებულია სავაჭრო ცენტრი, პარკირება 500 ავტომობილისთვის და ვერტმფრენის დასაჯდომი ადგილი.
სასტუმროსა და გამაჯანსაღებელი ცენტრის მართვა განხორციელდება საერთაშორისო ბრენდის მიერ. „გრინ რეზორტის“ მშენებლობისას გამოყენებული იქნება ენერგოეფექტური და ეკოლოგიურად სუფთა სამშენებლო მასალები. ტერიტორია აღჭურვილი იქნება ისეთი თანამედროვე ტექნოლოგიებით, როგორიცაა ელექტრომობილების დასამუხტი სადგურები და მზის ენერგიის პანელები.